डोटी, फागुन २४- नेपाल सरकारका गृहमन्त्री रमेश लेखकले निर्मला पन्तको रहस्यमय हत्याकाण्डको विषयमा थप अनुसन्धान भइरहेको बताएका छन् । भूकम्पीय पुनर्निर्माण तथा पुनस्र्स्थापना आयोजना कार्यान्वयन एकाइ कार्यालयको उद्घाटन गर्न अछाम जाने क्रममा शनिवार डोटीको दिपायलमा प्रेस युनियन डोटीले आयोजना गरेको पत्रकार सम्मेलनमा बोल्दै गृहमन्त्री लेखकले यस्तो बताएका हुन् ।
उनले आफू गृहमन्त्री भएर आउने बित्तिकै निर्मला पन्तको हत्याकाण्डबारे गहिरो ढंगले थप अनुसन्धान गर्न निर्देशन दिएको दाबी गरे ।
‘यो मानवता विरुद्धको जघन्य अपराध हो, यो घटनाका दोषीहरुलाई सजाय नभएसम्म निर्मलाप्रति न्याय हुन सक्दैन’ गृहमन्त्री लेखकले भने ‘मैले गृहमन्त्री भएर आइसकेपछि थप अनुसन्धान गर्न निर्देशन गरिसकेको छु र अनुसन्धान जारी छ ।’ उनले निर्मला पन्तको घटना लगायत महिलामाथि हुने यस्ता प्रकारका घटनाहरूका विषयमा सरकार गम्भीर भएको बताए ।
‘महिलाहरूमाथि हुने घटनाहरूलाई हामी सबैले गम्भीर रूपमा हेर्न जरुरी छ, जस्तोसुकै होस्, अपराधलाई अपराधीकै रूपमा हेर्नु पर्छ’ सञ्चारकर्मीहरूद्वारा सोधिएको एक प्रश्नको जवाफमा उनले भने ‘अपराधीलाई पनि अपराधीकै रूपमा हेर्नु जरुरी छ ।’
