नवलपुर । नवलपुरको गैँडाकोटमा भोलिदेखि चौथो मेयरकप अन्तर विद्यालय छात्र फुटबल प्रतियोगिता हुने भएको छ । गैँडाकोट नगर खेलकुद विकास समितिको आयोजनामा हुने प्रतियोगितामा नगरपालिकाभित्रका ३० विद्यालयका कक्षा ८ सम्म अध्ययन गर्ने विद्यार्थी सहभागी हुने जनाइएको छ ।
आज आयोजित पत्रकार सम्मेलनमा गैँडाकोट नगरपालिका प्रमुख मदनभक्त अधिकारीले सबै विद्यालयले खेलकुदमा सहभागिता जनाउँदा खेलकुदको विकास हुने बताउनुभयो । नगर क्षेत्रभित्र हुने सबै खेलकुदका कार्यक्रम नगरको शान भएको उल्लेख गर्दै उहाँले खेलकुदका गतिविधि बढ्दै गएमा यहाँबाट राष्ट्रिय खेलाडी उत्पादनमा सहयोग पुग्ने बताउनुभयो । पत्रकार सम्मेलनमा नगर उपप्रमुख शान्ति कोइरालाले नगरपालिकाले विद्यालय खेलकुदको विकास गर्नका लागि सक्दो सहयोग गर्दै आएको बताउनुभयो ।
गैँडाकोट नगर खेलकुद विकास समितिका संयोजक धामनाथ सापकोटाले विद्यालयमा आयोजना हुने खेलकुदले खेलाडी उत्पादनमा सहयोग गर्ने भएकाले प्रतियोगिता आयोजना गरिएको बताउनुभयो । “विद्यालयमा बिहानदेखि बेलुकासम्म विद्यार्थीलाई अध्ययन मात्रै गराइन्छ” उहाँले भन्नुभयो, “खेलकुदको माध्यमबाट पनि विद्यार्थीहरु राष्ट्रिय अन्तर्राष्ट्रिय प्रतियोगितामा पुग्न सफल भएकाले प्रतियोगिता आयोजना गरिएको हो ।” दिनभर विद्यार्थीलाई पढाउनुस् तर दैनिक एकघण्टा खेलकुदका लागि छुट्टाउनु भन्दै आफूहरु नगरभित्रका सबै विद्यालयमा पुग्ने तयारी गरेको सापकोटाको भनाइ छ ।
प्रतियोगितामा विजेता हुने समूहले उपाधिसहित रु ५१ हजार पुरस्कार प्राप्त गर्नेछन् । त्यस्तै उपविजेताले रु ३१ हजार तथा सेमी फाइनलमा पुग्ने दुई समूहले रु १६ हजार पुरस्कार प्राप्त गर्ने प्रतियोगिता संयोजक लक्ष्मण कार्कीले जानकारी दिनुभयो । कार्कीकाअनुसार प्रत्येक खेलको उत्कृष्ट खेलाडीलाई रु एक हजार, प्रतियोगिता अवधिभरको उत्कृष्ट खेलाडीलाई रु पाँच हजार तथा प्रतियोगिता अवधिभरको उत्कृष्ट गोल किपर, उत्कृष्ट डिफेन्डर, उत्कृष्ट मिड फिल्डर, उत्कृष्ट स्ट्राइकर र उच्च गोलकर्तालाई रु तीन हजारका दरले पुरस्कार प्रदान गरिनेछ । प्रतियोगिता गैँडाकोट नगरपालिकाको प्रस्तावित क्षेत्रीय रङ्गशालामा हुनेछ ।