नवलपुर, १९ माघ । हृदयघातका कारण नवलपरासी (बर्दघाट–सुस्तापूर्व)को कावासोती–१ का वडाध्यक्ष तवारक अहमद मियाको मृत्यु भएको छ ।
आज दिउँसो राष्ट्रिय युवा सङ्घ नवलपुरको १०औँ जिल्ला अधिवेशनमा सहभागी हुन गैँडाकोट पुग्नुभएका वडाध्यक्ष मियालाई श्वासप्रश्वासमा समस्या भएपछि चितवनको भरतपुरस्थित चितवन मेडिकल कलेज लगिएको थियो । अस्पतालमा उपचारका क्रममा मियाको मृत्यु भएको उपचारमा संलग्न चिकित्सकले पुष्टि गरेका छन् । राष्ट्रिय युवा सङ्घ नवलपुरको सहसचिवसमेत रहनुभएका वडाध्यक्ष मियाले जिल्ला अधिवेशन उद्घाटन कार्यक्रममा स्वागत मन्तव्य राखेपश्चात उहाँलाई एक्कासि श्वासप्रश्वासमा समस्या देखिएको थियो ।
राष्ट्रिय युवा सङ्घ नवलपुरका जिल्ला अध्यक्ष कृष्ण कँडेलले श्वास प्रश्वासमा सदस्या देखिएपछि उहाँलाई तुरुन्तै अस्पताल लगिएको बताउनुभयो । केहीबेरको उपचार पश्चात उहाँलाई चिकित्सकले मृत घोषणा गरेका कँडेलको भनाइ छ । मियाको मृत्यु पश्चात युवा सङ्घको जिल्ला अधिवेशनसमेत स्थगित गरिएको उहाँले बताउनुभयो ।
सैतीस वर्षका उहाँका श्रीमती, तीन छोरी र एक छोरा हुनुहुन्छ । राष्ट्रिय युवा सङ्घ नेपाल नवलपुरका सहसचिवसमेत रहनुभएका उहाँ स्थानीय तह निर्वाचनमा नेपाल कम्युनिष्ट पार्टी (एमाले) का तर्फबाट निर्वाचित हुनुभएको थियो ।