चितवन, ११ माघ । भोलि (शनिबार)देखि सुरु हुने राइजिङ भरतपुर गोल्डकप–२०८१ को ट्रफीको अनावरण गरिएको छ । प्रतियोगिता हुने ठाउँ भरतपुर–१० स्थित नेपाल प्रहरी शिक्षालयमा आज (शुक्रबार) आयोजित पत्रकार सम्मेलनमा ट्रफी अनावरण गरिएको हो ।
पत्रकार सम्मेलनमा प्रतियोगिताको आयोजक चितवन ११ फुटबल क्लबका अध्यक्ष सुशील कार्कीले यस प्रतियोगिता चितवनको फुटबल विकासका लागि महत्वपूर्ण हुने बताउनुभयो । चितवन जिल्लाकै सबैभन्दा ठूलो पुरस्करा राशिको फुटबल प्रतियोगिताको उद्घाटन खेल आबु खैरहनी गाउँपालिका र भरतपुर २४ खेलकुद विकास समितिबीच भोलि दिउँसो २ बजे हुने कार्कीको भनाइ छ । प्रतियोगिताको सम्पूर्ण तयारी पूरा भइसकेको भन्दै अध्यक्ष कार्कीले खेलको उद्घाटन बागमती प्रदेश सरकारका युवा तथा खेलकुद मन्त्री मिनकृष्ण महर्जनले गर्ने बताउनुभयो ।
आठ वटा टिम सहभागी प्रतियोगिताको विजेताले उपाधिसहित सात लाख रुपैयाँ तथा उपविजेताले तीन लाख रुपैयाँ पुरस्कार पाउनेछ । त्यस्तै, प्रतियोगिताको सर्वोत्कृष्ट खेलाडी, उत्कृष्ट गोलरक्षक, उत्कृष्ट रक्षापङ्क्तिका खेलाडीलाई जनही १० हजार रुपैयाँ तथा प्रत्येक खेलको उत्कृष्ट खेलाडीलाई पाँच हजार रुपैयाँ प्रदान गरिने कार्कीको भनाइ छ । प्रतियोगिताको प्रत्यक्ष प्रसारण टिम ११ युट्युब च्यानल तथा राइजिङ भरतपुर गोल्डकपको फेसबुक पेजबाट हुने कार्कीले जानकारी दिनुभयो ।
प्रतियोगिताको फाइनल खेल माघ १९ गते हुनेछ । यसैबीच, माघ १८ गते विभिन्न चार वटा टिमबीच मैत्रीपूर्ण फुटबल प्रतियोगिता गरिने आयोजकले जनाएको छ । आयोजक संस्थाका अध्यक्ष कार्कीकाअनुसार नेपाल पत्रकार महासंघ चितवन, नेपाल प्रहरी शिक्षालय, चितवनका चिकित्सक र भरतपुर महानगरपालिकामा कार्यरत इन्जिनियरबीच मैत्रीपूर्ण फुटबल खेलाइनेछ ।
आयोजकले जारी गरेको खेलकुद तालिकअनुसार वैशाख १३ गते बागमती युथ क्लब सर्लाही र सूर्यपुर फुटबल क्लबबीच प्रतिस्पर्धा हुनेछ । त्यस्तै माघ १४ गते गैँडाकोट फुटबल क्लब नवलपुर र प्याराडाइज युवा क्लब चितवनबीच तथा माघ १५ गते सरस्वती युथ क्लब काठमाडौँ र नेपाल पुलिस क्लबबीच समूह चरणको प्रतियोगिता हुनेछ । त्यस्तै माघ १६ गते हुने पहिलो सेमीफाइनलमा माघ १२ गतेको विजेता र माघ १४ गतेको विजेता तथा माघ १७ गते हुने दोस्रो सेमीफाइनलमा माघ १३ गतेको विजेता र माघ १५ गतेको विजेताबीच प्रतिस्पर्धा हुनेगरी खेलकुदको समय तालिका सार्वजनिक गरिएको छ ।