नवलपुर, २९ कात्तिक । तीन जिल्लाको सिमानामा पर्ने पवित्र धार्मिकस्थल देवघाटमको पूर्ण परिक्रमा गरिएको छ । कात्तिक शुक्ल वैकुण्ठ चतुर्दशीको अवसर पारेर नेपाल सन्त समाजको आह्वानमा बिहीबार ‘देवघाटधाम गण्डकी परिक्रमा’ गरिएको हो ।
नवलपरासी (बर्दघाट–सुस्तापूर्व), तनहुँ र चितवनमा पर्ने देवघाट क्षेत्रले ओगटेको क्षेत्रलाई समेटर यस क्षेत्रभित्र पर्ने विभिन्न धार्मिकस्थल तथा मन्दिरहरुको परिक्रमा गरिएको देवघाटस्थित महेश सन्यास आश्रमका पीठाधीश श्री १००८ स्वामी रमणानन्द गिरीजी महाराजले बताउनुभयो । कालीगण्डकी र त्रिशूली नदीको बेणी सङ्गममा स्नान गरेर सुरु गरिएको परिक्रमाले तीनवटै जिल्लामा गरी २४ किलोमिटर दूरी पैदल यात्रा गरी देवघाटधामको पूर्ण परिक्रमा गरिएको उहाँले बताउनुभयो । “देवघाटको बेणी सङ्गममा स्नानपछि शालीग्राम भगवान्लाई शीरमा राखेर हामीले खालीखुट्टा नै गण्डकी परिक्रमा गरेका हौँ” उहाँले भन्नुभयो, “यस क्रममा तनहुँतर्फ देवघाट वेणीसङ्गम, विभिन्न मन्दिरहरु, चितवनतर्फ देवघाट, हरिहर मन्दिर, नवलपुरतर्फ गैँडाकोटाको पुल्चोक, लक्ष्मीनृसिंह दिव्यधाम, मौलाकालिका मन्दिर, देवघाट परिक्रमा गरी काली र त्रिशूलीको बेणी सङ्गमा पुगेर परिक्रमा पूरा ग¥यौँ ।”
सम्पूर्ण तीर्थहरुको पनि तीर्थ देवघाट भएकाले विश्वमाझ यसको महिमा उजागर गर्न र देवघाटधामलाई धार्मिक केन्द्र बनाउँदै धार्मिक पर्यटनको प्रवद्र्धन गर्नका लागि ‘देवघाटधाम गण्डकी परिक्रमा’ महोत्सव गरिएको उहाँले बताउनुभयो । उक्त कार्यक्रमअन्तर्गत तनहुँतर्फ देवघाटको वेणीसङ्गम, गलेश्वर आश्रम, चक्रवर्ती आश्रम, महेश सन्यास आश्रम, हरिहर सन्यास आश्रम, गणेश मन्दिर, केदारेश्वर मन्दिर, बद्रिनाथ मन्दिर, मणिमुकुन्देश्वर चक्रवर्ती आश्रम को परिक्रमा गरिएको उहाँले बताउनुभयो ।
त्यस्तै चितवनतर्फ देवघाटको सङ्कल्पेश्वर महादेव मन्दिर, विश्वशान्ति यज्ञशाला मन्दिर, राम मन्दिर, लक्ष्मीनारायण मन्दिर, राधाकृष्ण मन्दिर, योगी नरहरिनाथ आश्रम, गौशाला, वागीश्वरी मन्दिर, गौरेश्वर पशुपतिनाथ मन्दिर, नारायणगढको हरिहर मन्दिर परिक्रमा गरिएको उहाँको भनाइ छ ।
नवलपुरतर्फ गैंडाकोटको पुलचोकमा रहेको गोपेश्वर महादेव मन्दिर, मौलाकाली भगवती मन्दिर, सुकदेव भागवत आश्रम, रमानुज वेद विद्याश्रम, राधाकृष्ण मन्दिर, लक्ष्मीनृसिंह दिव्यधाम मन्दिरको परिक्रमा गरिएको उहाँको भनाइ छ । बिहान देवघाटधामबाट निस्किएको परिक्रमा टोलीलाई नवलपुरका विभिन्न ठाउँमा स्थानीयले स्वागत गरेका थिए । देवघाटधामको पूर्ण परिक्रमाबाट दुर्लभ देवादिहरुको पूजन, सिद्ध हरिहर क्षेत्रको भ्रमण, धार्मिक नगरी गैँडाकोटको अवलोकन, प्रसिद्ध मौलाकालिका भगवतीको दर्शन, रमणीय पर्वतको परिक्रमा, धार्मिक पर्यटनको प्रवद्र्धन र वैदिक सनातन धर्मको प्रचार हुने उहाँले बताउनुभयो ।
चालीस वर्ष अगाडि सुरु भएको देवघाट परिक्रमा बीचमा केही वर्ष रोकिएकोमा विगत तीन वर्षदेखि नियमित रुपमा कात्तिक शुक्ल चतुर्दशीका दिनमा सञ्चालन गरिएको देवघाट क्षेत्र विकास समितिका पूर्वअध्यक्ष टंकनाथ पौडेलले बताउनुभयो । पवित्र देवघाटधाम र गण्डकी सङ्गममा स्नान, जप, तप, न्यास, ध्यानादी कार्य मोक्ष प्राप्त हुने तथा मृत्यु पश्चात् यसै क्षेत्रमा अन्तिम संस्कार भएमा मुक्ति प्राप्त हुने हिन्दु धर्मको पौराणिक मान्यता भएको र विभिन्न धार्मिक ग्रन्थमा देवघाटधामको महिमा उल्लेख भएको पौडेलको भनाइ छ ।
देवघाटधाम परिक्रममाका अवसरमा देवघाटका सन्तमहन्तहरु, क्षेत्र विकास समितिका पदाधिकारीहरु, गुरुकुल एवम् विद्यालयका विद्यार्थीहरु, जनप्रतिनिधिहरु एवम् कर्मचारी तथा वैदिक सनातनी गरी करिब दुई हजारको सङ्ख्यामा सहभागिता रहेको पौडेलले बताउनुभयो ।