नवलपुर, १३ पुस । परियार सेवा समाज नवलपुरले जिल्लाको पहाडी क्षेत्रका एक सय ७३ जना विद्यार्थीलाई न्यानो कपडा वितरण गरेको छ । कठ्याङ्ग्रिदो जाडोमा तातो लुगा अभावमा विद्यालय जान बाध्य बुलिङटारका विद्यार्थीलाई समाजले शुक्रबार न्यानो लुगा वितरण गरेको हो ।
बुलिङटार गाउँपालिका–१ थामबेंसीमा रहेको श्री छत्तीसादेवी माविमा अध्ययनरत विद्यार्थीहरुलाई समाजले न्यानो लुगा अन्तरगत ट्रयाकसुट वितरण गरेको परियार सेवा समाज नवलपुरका अध्यक्ष प्रकाश परियारले जानकारी दिनुभयो । विद्यालयको कक्षा १ देखि कक्षा १० सम्म पढ्ने सम्पूर्ण विद्यार्थीलाई न्यानो लुगा वितरण गरिएको परियारको भनाइ छ । कार्यक्रममा नेपाली कांग्रेसका सहमहामन्त्री तथा संघीय सांसद जीवन परियार प्रमुख अतिथि रहनुभएको थियो ।
विद्यार्थीहरुलाई न्यानो कपडा वितरण कार्यक्रममा गैँडाकोटको अक्सफोर्ड कलेज अफ इन्जिनियरिङ एण्ड म्यानेजमेन्ट, कृष्ण कार्की, आनन्द खनाल, उषा परियार, यम परियार, रोशन सापकोटा, नवीनभक्त अधिकारी, गोबिन्द गुरुङलगायतको सहयोग रहेको थियो । कार्यक्रममा नेपाल उद्योग वाणिज्य महासंघ गण्डकी प्रदेशका अध्यक्ष अमृत भट्टचन, परियार सेवा समाजका केन्द्रीय सदस्यद्वय यम परियार र रुपेस कुमार नेपाली, गण्डकी प्रदेश सदस्य विकास परियार तथा शशि बस्ताकोटी, ओमकुमार श्रेष्ठ, साकिला परियारलगायतको उपस्थिति रहेको थियो ।