नवलपुर, २६ मंसिर । गैँडाकोट ४ मा रहेको मुना बचत तथा ऋण सहकारी संस्था (साकोस) लिमिटेडले आफ्नो नवौँ वार्षिकोत्सव तथा स्थापना दिवस मनाएको छ ।

विभिन्न कार्यक्रम गरी साकोसले स्थापना दिवस मनाएको हो । साकोसले वार्षिकोत्सवको अवसर पारेर हिजो संस्थाको परिसरमा दीप प्रज्ज्वलन तथा पठन संस्कृति अभियान अन्तर्गत जनक माविका विद्यार्थीहरुलाई बाल साहित्यका पुस्तकहरु वितरण गरेको संस्थाका अध्यक्ष मिलनराज घिमिरेले बताउनुभयो ।

जनक माविका सबैभन्दा कनिष्ठ विद्यार्थी सामरी गुरुङ प्रमुख अतिथि रहनुभएको कार्यक्रम संयोजक हरिप्रसाद गौतमले जानकारी दिनुभयो । कार्यक्रममा टोलनाथ घिमिरे, ईश्वरीनाथ रिमाल, केशवप्रसाद सापकोटालगायतको सहभागिता रहेको थियो । संस्थाका उपाध्यक्ष सीता चापागाईले स्वागत मन्तव्य राख्नुभएको कार्यक्रमको सहजीकरण संस्थाका सचिव शान्ता पाण्डेले गर्नुभएको थियो ।