काठमाडौं, कात्तिक २१- सरकारले नेपाली सेना, नेपाल प्रहरी र सशस्त्र प्रहरी बलका लागि हातहतियार किन्ने तयारी गरेको छ। राष्ट्रिय सुरक्षा परिषद्को बैठकले राष्ट्रिय तथा अन्तर्राष्ट्रिय परिस्थिति जटिल बन्दै गएको भन्दै नेपाली सेनालाई आवश्यक हतियार खरिद गर्न सरकारलाई आग्रह गरेको सन्दर्भमा यही कात्तिक ११ गते बसेको मन्त्रिपरिषद् बैठकले हतियार किन्ने निर्णय गरेको हो। राष्ट्रिय सुरक्षा परिषद्को अध्यक्ष प्रधानमन्त्री हुन्छन्।
राष्ट्रिय सुरक्षा परिषद्को बैठकअघि गृह मन्त्रालयले पनि नेपाल प्रहरी र सशस्त्र प्रहरी बललाई आवश्यक पर्ने हातहतियार खरिदका लागि अनुमानित लागत माग गरेको स्रोतले जनाएको छ। नेपाल प्रहरी र सशस्त्र प्रहरी बलले विगतमा ल्याउन खोजेका हतियार नै किन्न चाहेका छन्। ‘नेपाल प्रहरीले विगतमा खरिद गर्न चाहेका हतियार नै माग गरेको छ। त्यसमा मन्त्रालय तयार भैसकेको छ’, गृह मन्त्रालय स्रोतले भन्यो।
प्रधानमन्त्री केपी शर्मा ओलीको अध्यक्षतामा बसेको राष्ट्रिय सुरक्षा परिषद्को ३५औं बैठकले नेपाली सेनालाई आवश्यक हतियार खरिदका लागि स्वीकृति लिन मन्त्रिपरिषद्मा प्रस्ताव पठाउने निर्णय गरेको थियो। यो निर्णयसँगै नेपाल प्रहरी र सशस्त्र प्रहरी बलले पनि यसपटक आआफ्नो संगठनका लागि आवश्यक हतियार आउने अपेक्षा गरेका छन्।
‘सुरक्षा परिषद् बैठकले नेपाली सेनालाई आर्थिक वर्ष २०८१/८२ का लागि हातहतियार, गोली गठ्ठालगायतका सैन्य सामग्री खरिद निर्णय गरेको छ। सेनालाई मात्र होइन, नेपाल प्रहरी र सशस्त्र प्रहरी बललाई पनि हतियार आवश्यक छ भन्ने सरकारलाई थाहा छ। त्यसकारण यसपटक आवश्यक हतियार खरिद हुन्छ भन्नेमा हामी पनि ढुक्क छौं’, नेपाल प्रहरीका एक उच्च अधिकारीले भने। सुरक्षा परिषद् बैठकमा प्रधानमन्त्री ओलीसहित गृहमन्त्री रमेश लेखक, रक्षामन्त्री मानबीर राई, मुख्यसचिव एकनारायण अर्याल, प्रधानसेनापति अशोकराज सिग्देल, रक्षासचिव रामेश्वर दंगाल उपस्थित थिए। बैठकमा राष्ट्रिय सुरक्षामा आउन सक्ने विभिन्न चुनौती, राष्ट्रिय र अन्तर्राष्ट्रिय स्तरमा देखापरेका सुरक्षा चुनौतीका विषयमा पनि छलफल भएको थियो। रक्षा सचिव दंगालले जारी गरेको विज्ञप्तिमा हतियार खरिद गर्नुपर्ने कारणबारे उल्लेख गरिएको छ। यो समाचार नागरिक दैनिकमा छ ।
