चितवन, १३ कात्तिक । माइती नेपाल चितवन शाखाले सन् २०२४ को हालसम्म सात जनाको उद्धार गरेको छ ।
माइती नेपाल चितवनले मंगलबार भरतपुरमा आयोजना गरेको मानव बेचबिखन तथा ओसारपसार र बाल यौन शोषण नियन्त्रणका लागि सरोकारवालाहरुको बैठकमा कार्यक्रम संयोजक ईश्वर गिरीले चार बालिका सहित सात जनाको उद्धार गरेको तथ्यांक प्रस्तुत गर्नुभयो । उहाँकाअनुसार उद्धार गरिएकामध्ये तीन जना महिला रहेका र सबै दलित तथा जनजाति रहेका बताउनुभयो । उहाँकाअनुसार संस्थाले यस वर्ष ६ बालिका तथा दुई महिलामाथि जबरजस्ती करणी भएको भन्दै मुद्दा दायर गरेको छ ।
यो अवधिमा माइती नेपाल चितवनले एक सय ११ बालिका, चार बालक र एक सय आठ महिला गरी दुई सय २३ जनालाई बचावट गरेको गिरीले बताउनुभयो । उहाँकाअनुसार मानव बेचबिखन तथा ओसारपसार र बाल यौन शोषण नियन्त्रणका लागि दिगो पुनस्र्थापनामा कमी, प्रेषण व्यवस्था स्पष्ट नहुनु, प्रभावितहरुको गोपनियताको कमी समस्या र चुनौतीको रुपमा रहेको बताउनुभयो । त्यस्तै, आरोपीबाट अनावश्यक दबाब, उद्धार गृहको अभाव रहेको बताउनुभयो ।
सो कार्यक्रममा चितवनका प्रमुख जिल्ला अधिकारी प्रकाश पौडेलले जिल्लामा रहेका संघसंस्थासँग सहकार्य गरेर दिगो व्यवस्थापन गर्ने बताउनुभयो । दलित र सुकुमबासी बस्तीहरुमा नागरिकताको समस्या भएको गुनासो सम्बोधनका लागि आफूले सक्दो काम गर्ने उहाँको भनाइ थियो । छलफलका क्रममा सरोकारवालाहरुले सुकुमबासी बस्तीमा नागरिकताको समस्या हुँदा सामाजिक अपराधका घटना बढेका, बलात्कारको विषयमा अदालतबाट तुरुन्त क्षतिपूर्ति दिनुपर्ने व्यवस्था भए पनि मुद्दा कमजोर हुँदा बयान फेरिने गरेकालगायतका समस्या भएकाले त्यसतर्फ ध्यान दिनुपर्नेमा जोड दिएका थिए ।
कार्यक्रममा जिल्ला प्रहरी कार्यालय चितवनका प्रहरी नायब उपरीक्षक भेषराज रिजाल, चितवन जिल्ला अदालतका शाखा अधिकृत पद्मा शर्मा, जिल्ला जनस्वास्थ्य कार्यालय चितवनका ईन्द्रमणि भण्डारीलगायत जिल्लाका सरोकारवालाहरुको उपस्थिति रहेको थियो ।