नवलपुर, १९ भदौ । नवलपुरको गैँडाकोट–१ मा रहेको सरस्वती निकेतन अङ्ग्रेजी आवासीय माविमा कक्षा १२ का विद्यार्थीलाई बिदाइ तथा कक्षा ११ का विद्यार्थीहरुलाई स्वागत गरेको छ । कक्षा १२ का विद्यार्थीहरुले कक्षा १२ उत्तीर्ण भएर गएका विद्यार्थीलाई बिदाइ गर्दै कक्षा ११ मा भर्ना भएका विद्यार्थीलाई स्वागत गरेको हो ।कक्षा १२ कि छात्रा प्रशंसा तिमिल्सिनाको अध्यक्षतामा भएको कार्यक्रममा नारायणप्रसाद खनाल प्रमुख अतिथिको रुपमा रहनुभएको थियो । कार्यक्रममा गैँडाकोट–१ का वडाध्यक्ष सुरेन्द्रप्रसाद रेग्मी, गैँडाकोट–२ का वडाध्यक्ष प्रकाश सापकोटा, विद्यालयका प्राचार्य भरतबाबु कँडेल, आरती कँडेल, सहप्रचार्य लक्ष्मण कँडेल, राष्ट्रिय परीक्षा बोर्डको कार्यक्रम संयोजक कमल तिवारी, सेन्ट्रल कलेज अफ भोकेसनल प्रालिका प्रिन्सिपल वाई बी पौडेललगायतको उपस्थिति रहेको थियो ।

कार्यक्रममा विद्यार्थीहरुले र्‍याम्प वाक, सांस्कृतिक नृत्य, ब्याण्डको प्रस्तुती, रिमिक्स नृत्य प्रस्तुत गरेका थिए । कक्षा ११ का ४० जना विद्यार्थीलाई स्वागत गरिएको कार्यक्रममा कक्षा १२ उत्तीर्ण भएर गएका एक सय २० जना विद्यार्थीहरुलाई बिदाइ गरिएको थियो । उक्त कार्यक्रममा प्रमुख अतिथि नारायणप्रसाद खनाल, वडाध्यक्ष प्रकाश सापकोटा, विद्यालयका प्राचार्य भरतबाबु कँडेल, सेन्ट्रल कलेज अफ भोकेसनल प्रालिका प्रिन्सिपल वाई बी पौडेल, विद्यालयका नेपाली शिक्षक राजेन्द्र रेग्मीलगायतले मन्तव्य राख्नुभएको थियो । कार्यक्रमको सञ्चालन प्रवेश सिमावडा र दीक्षा अधिकारीले गर्नुभएको थियो ।