नवलपुर, १८ भदौ । नेपाल प्रहरी प्रधान कार्यालय मानवश्रोत विकास विभागले सोमबार एकैपटक पाँच सय ८७ जना प्रहरी निरीक्षकको सरुवा तथा काज सरुवा गरेको छ । प्रहरी महानिरीक्षकको निर्णयअनुसार प्रचलित नियमानुसार तलब, भत्ता समेत सरुवा भएकै दरबन्दीबाट पाउने गरी प्रहरी निरीक्षकहरुको सरुवा गरिएको हो ।
प्रहरी प्रधान कार्यालयले निकालेको सरुवा सूचिअनुसार नवलपुरको इलाका प्रहरी कार्यालय गैँडाकोटको प्रमुख भएर प्रहरी निरीक्षक कमला नराल आउनुहुने भएको छ । काठमाडौँ उपत्यका प्रहरी कार्यालय प्रशासन शाखा रानीपोखरी काठमाडौँमा कार्यरत नराल इलाका प्रहरी कार्यालय गैँडाकोटको प्रमुख भएर आउन लाग्नुभएको हो ।
गैँडाकोटका प्रहरी प्रमुख हस्तबहादुर सुनारको नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय रामनगर चितवन सरुवा भएपछि नराल गैँडाकोटको नेतृत्व सम्हाल्न आउन लाग्नुभएको हो । नराल यसअघि जिल्ला प्रहरी कार्यालय चितवनमासमेत कार्यरत रहनुभएको थियो । विसं २०७८ मा चितवनमा रहँदा उत्कृष्ट कार्य गरेवापत जिल्ला प्रहरी कार्यालय चितवनले उहाँको कामको कदर गर्दै पुस महिनामा बेस्ट पोलिस अफ द मन्थ घोषणा गरि पुरस्कृत गरेको थियो । प्रहरी सरूवा सूचि हेर्न यहाँ क्लिक गर्नुहोला ।
