नवलपुर, १० भदौ । नवलपुरको गैँडाकोट–१ मा रहेका सरस्वती निकेतन अङ्ग्रेजी आवासीय माध्यमिक विद्यालयले विद्यार्थीहरुबीचमा कार्भिङ प्रतिस्पर्धा तथा दीक्षान्त समारोह गरेको छ ।

विद्यालयले आइतबार कक्षा १२ मा होटल व्यवस्थापन अध्ययनरत विद्यार्थीहरुबीच कार्भिङ (तरकारी तथा फलफूलमा कलात्मक तस्बिर बनाउने) प्रतियोगिता गरेको हो । प्रतियोगितामा कक्षा १२ का १६ वटा समूहले सहभागिता जनाएका विद्यालयका सहायक प्रिन्सिपल लक्ष्मण कँडेलले जानकारी दिनुभयो । विद्यार्थीहरुले फलफूल तथा तरकारीमा मयुर, हाँस, पुतलीलगायतका जीवजन्तुहरुको कलात्मक चित्र प्रस्तुत गरेका थिए ।

विद्यालयको प्रतिपर्धामा यार्सागुम्बा समूह पहिलो हुँदै रु पाँच हजार पुरस्कार प्राप्त गरेको छ । त्यस्तै बटरबिन समूह दोस्रो हुँदै रु तीन हजार एवम् तेस्रो हुँदै स्पारोगस समूहले रु दुई हजार पुरस्कार हात पारेको कँडेलले बताउनुभयो ।
यसैबीच, विद्यालयले आइतबार नै दीक्षान्त समारोह समेत गरेको छ । विद्यालयबाट कक्षा ८ को आधारभूत तह परीक्षा उत्तीर्ण गरेका ४९ विद्यार्थीहरुलाई दीक्षित गरेको छ । विद्यालयको शिक्षक अभिभावक संघका अध्यक्ष कमलापति शर्माको अध्यक्षतामा भएको दीक्षान्त समारोहमा विद्यालयका प्रिन्सिपल भरतबाबु कँडेलसहित शिक्षक र अभिभावकहरुको सहभागिता रहेको कार्यक्रमको सहजीकरण विद्यालयका शिक्षक रामकृष्ण कोइरालाले गर्नुभएको थियो ।