नवलपुर, ७ भदौ । स्थानीय सरकार संस्थागत क्षमता मूल्यांकनमा नवलपुरको गैँडाकोट नगरपालिका गण्डकी प्रदेशकै उत्कृष्ट नगरपालिका ठहरिएको छ । गण्डकी प्रदेशका ११ वटा जिल्लामा रहेका स्थानीय तहहरुलाई पछि पार्दै गैँडाकोट नगरपालिका प्रदेशमै उत्कृट पालिका बन्न सफल भएको हो ।

संघीय मामिला तथा सामान्य प्रशासन मन्त्रालयले गरेको स्थानीय सरकार संस्थागत क्षमता मूल्यांकनमा नवलपुरको गैँडाकोट नगरपालिकासँगै म्याग्दीको बेनी नगरपालिकाले समान ८७ अंक प्राप्त गर्दै प्रदेशकै उत्कृष्ट पालिका बन्न सफल भएका हुन् । गैँडाकोट नगरपालिकाका प्रमुख प्रशासकीय अधिकृत झविन्द्र खनालका अनुसार मन्त्रालयले देशभरीका सात सय ५३ वटा पालिकाको संस्थागत क्षमता मूल्यांकन गरेको थियो । मन्त्रालयले स्थानीय सरकारको क्षमता मूल्यांकनका लागि १० वटा क्षेत्र र सूचक तोकेर अंक प्रदान गरेको थियो ।

स्थानीय सरकार संस्थागत क्षमता मूल्यांकनमा जिल्ला र प्रदेशकै पहिलो नगरपालिकाको रुपमा गैँडाकोट नगरपालिका पर्न सफल भएको भन्दै प्रमुख प्रशासकीय खनालले नगरप्रमुखको समन्वय एवम् कर्मचारीहरुको मेहनतका कारण सफलता मिलेको बताउनुभयो । गैँडाकोटले शासकीय प्रबन्धमा ७.७५, संगठन तथा प्रशासनमा ६, वार्षिक बजेट तथा योजना तर्जुमा व्यवस्थापनमा ९.५, वित्तीय एवम् आर्थिक व्यवस्थापनमा १०, सेवा प्रवाहमा १४.५, न्यायिक कार्यसम्पादनमा ७, भौतिक पूर्वाधारमा ११.५, सामाजिक समावेशीकरणमा ७.५ र वातावरण संरक्षण तथा विपद् व्यवस्थापनमा ८ अंक सहित कुल ८७ अंक प्राप्त गरेको हो ।

शासकीय प्रबन्ध, संगठन तथा प्रशासन, वार्षिक बजेट तथा योजना व्यवस्थापन, वित्तीय एवम् आर्थिक व्यवस्थापन, सार्वजनिक सेवा प्रवाह, न्यायिक कार्यसम्पादन, भौतिक पूर्वाधार, सामाजिक समावेशीकरण, वातावरण संरक्षण तथा विपद् व्यवस्थापन र सहकार्य र समन्वयगरी १० वटा क्षेत्र तथा त्यहाँ भएका कामको मूल्यांकन गरी फरक फरक पूर्णांक तोकिएको थियो ।

प्रदेशकै उत्कृष्ट पालिकामा गैँडाकोट पर्नुले गैँडाकोटमा आवश्यकताअनुसार काम भएको देखिने नगरप्रमुख मदनभक्त अधिकारीले बताउनुभयो । प्रदेशको उत्कृष्ट बन्न सफल पालिकालाई नमूना पालिका बनाउने गरी काम भइरहेको अधिकारीको भनाइ छ ।