काठमाडौंमा हुने उक्त खेलका लागि चर्च ब्वाइजले बलियो टोली निर्माण गर्ने भएको छ । केहि समय अघि नै क्लबले अनन्त तामाङले टोलीको कप्तानी गर्ने व्यहोरा सार्वजनिक गरिसकेको थियो । त्यसबाहेक क्लबले अन्य खेलाडी थप गर्दै बलियो टोली निर्माण गरिरहेको छ ।

गत सिजन क्लबको सफल लिग सिजनमा टोलीसँगै रहेका अनन्त बाहेकका अन्जन विष्ट र एरिक विष्टले क्लबसँग सम्झौता नविकरण गरेका छन् । त्यसबाहेक क्लबसँग मोफसल प्रतियोगिताहरुमा रहेका गोलकिपर दीप कार्कीले पनि क्लबसँग छन् ।

यसका साथै चर्च ब्वाइजले राष्ट्रिय टोलीका डिफेन्डर सनिश श्रेष्ठलाई समेत अनुबन्ध गरेको छ । गत सिजनको नेपाल सुपर लिगमा अनन्तसँगै रक्षापंक्तिमा रहेका सनिश चर्च ब्वाइजमा जोडिएका छन् । यस्तै युवा मिडफिल्डर लाकेन लिम्बु र फरवार्ड आयुष घलानले समेत टोलीसंग सम्झौता गरेका छन् ।

सबै खेलाडीहरुको सम्झौता एएफसी च्यालेन्ज लिग अवधिभरका लागि रहने क्लब श्रोतले जानकारी दिएको छ । यसका साथै क्लबले केही विदेशी खेलाडीहरुको अनुबन्धका लागि पनि तयारि गरिरहेको छ ।

क्लबले बालगोपाल महर्जनलाई मुख्य प्रशिक्षक निरन्तरता दिएको छ । गत सिजनको लिग उपाधि जित्दा अन्त्यमा बालगोपाल नै क्लबको मुख्य प्रशिक्षक रहेका थिए । प्रदिप हुमागाईको नेतृत्वमा स्टार खेलाडीले भरिएको टोलीले औसत प्रदर्शन मात्र गरेपछि क्लबले उनलाई बर्खास्त गरेको थियो । त्यसपछि महर्जनको नेतृत्वमा चर्च ब्वाइजले लय समात्दै उपाधि चुमेको थियो ।

पारो विरुद्ध प्लेअफ खेलमा जित हासिल गर्न सकेमा चर्च ब्वाइजले एएफसी च्यालेन्ज लिगको समूह चरण खेल्नेछ । यस्तै अर्को प्रारम्भिक छनोट खेलमा अफगानिस्तानको अट्याक एफसी र किर्गिज गणतन्त्रको एफसी अबदिश-अटा खेल्नेछन् ।

समूह चरणका खेलहरू अक्टोबर २६ देखि नोभेम्बर २ मा हुनेछ । यदि समूह चरणका लागि छनोट भएमा चर्च ब्वाइजले प्रतियोगिताको लागि न्यूनतम एक लाख अमेरीकी डलर प्राप्त गर्नेछ ।

एसियाली फुटबल महासंघले बिहीबार एएफसी क्लब प्रतियोगिता संरचनाको परिमार्जित भागको रूपमा प्रतियोगिताको घोषणा गर्दै नयाँ तेस्रो तहको महाद्वीपीय पुरुष प्रतियोगिताको खेलहरूको मिति तय गरेको हो । प्रतियोगिताको समूह चरणमा १८ टोलीले प्रतिस्पर्धा गर्नेछन् ।

पछिल्लो सिजन दोस्रो तहको एएफसी कपको पहिलो चरणको छनोटमा नेपालको मछिन्द्र क्लबले पारो एफसीलाई नै रंगशालामा हराएको थियो । मछिन्द्र प्लेअफको दोस्रो खेलमा भने भारतीय टोली मोहुन बगान विरुद्ध कोलकत्तामा पराजित भएको थियो ।