विश्व फुटबलमा उत्कृष्ट मध्यका एक फरवार्ड ह्यारी केन आफ्नो करिअरको पहिलो उपाधि जित्ने संघारमा छन् । राष्ट्रिय टोली र क्लब फुटबलमा थुप्रै व्यक्तिगत अवार्ड हासिल गरेका केनलले हालसम्म टिमका लागि भने कुनै उपाधि जित्न सकेका छैनन् । आइतबार स्पेनविरुद्ध युरो २०२४ को फाइनल केनका लागि सुवर्ण अवसर हुनेछ ।
युरोको अघिल्लो संस्करणको फाइनलमा इटालीसँग टाइब्रेकरमा पराजित हुँदा इंग्ल्यान्ड उपाधि जित्नबाट चुकेको थियो । त्यसो त केनसँगै इंग्ल्यान्ड पनि १९६६ यता चलेको उपाधिको खडेरी तोड्न चाहन्छ । प्रशिक्षक ग्यारेथ साउथगेट नियुक्त भएयता विश्वकप र युरोमा राम्रो प्रदर्शन गरेको इंग्ल्यान्ड पुन: एकपटक उपाधि नजिक पुगेको छ ।
केनका लागि व्यक्तिगत रुपमा यो पहिलो उपाधि हुने हुँदा विशेष रहनेछ । जारी प्रतियोगितामा ३ गोलसहित सर्वाधिक गोलकर्ताको होडमा समेत रहेका उनी टोलीलाई च्याम्पियन बनाउन चाहन्छन् । उपाधि जित्नकै लागि उनले गत सिजन आफ्नो बाल्यकालदेखिको क्लब टोटेनहम हट्सपर छोडेर बायर्न म्युनिख गएका थिए । तर दुर्भाग्य त्यो प्रयासले पनि राम्रो नतिजा दिन सकेन ।
व्यक्तिगत रुपमा केनका लागि सिजन फलदायी रहेपनि उनले क्लबबाट उपाधि जित्न भने सकेनन् । सिजनको पहिलो खेलमा बायर्न जर्मन सुपर कपमा लाइप्जिगसँग ३-० ले पराजित भयो । बायर्नले जर्मन लिग उपाधि जित्न नसकेपनि केन ३६ गोलसहित गोल्डेन बुट जित्न सफल रहे । च्याम्पियन्स लिगमा पनि टोलीले सफलता हात पार्न सकेन । तर केनले ८ गोलसहित किलीयन एम्बापपेसँग गोल्डेन बुट बाँडे ।
केनका लागि व्यक्तिगत रुपमा भने सिजन राम्रो रहेको छ । उनी जर्मन लिग र च्याम्पियन्स लिग दुवैको टिम अफ द सिजनमा पनि परे । युरोमा पनि उनले इंग्ल्यान्डका लागि ३ गोल गर्दै कप्तानी भूमिका निर्वाह गरेका छन् । तर अब खोज छ त मात्र उपाधिको ।
सन् २०१४-१५ र २०२०-२१ मा टोटेनहम लिग कपको फाइनलमा पराजित हुन पुगेको थियो । त्यस्तै सन् २०१८-१९ सिजनको च्याम्पियन्स लिग फाइनलमा लिभरपुलसँग पराजित हुँदा केन र टोटेनहम उपाधिबाट बन्चित भए । यसपटक युरोपेली च्याम्पियनसिप उपाधि जितेर केनसमक्ष त्यो खडेरी तोड्ने अवसर छ ।
केन आफैं पनि युरो जित्ने विश्वास राख्छन् । फाइनलको अघिल्लो दिन पत्रकार सम्मेलनमा उनले टोली तयार रहेको अभिव्यक्ति दिए ।
‘एकदम उत्साहित छौं । हामीले आफ्नो तर्फबाट सबै तयारी गरेका छौं । जब हामी फाइनल खेल्न उत्रन्छौं, आफ्नो देशको लागि सकेसम्म राम्रो गर्नेछौं ।’
विपक्षी टोलीको कुन खेलाडी खतरा बन्न सक्छ भन्ने प्रश्नमा केनले पूरा टोली नै राम्रो रहेको बताए । ‘कुनै व्यक्ति भन्दापनि स्पेन आफैंमा राम्रो टोली छ । हो दुवै विंगर, मोराटा र ओल्मोले राम्रो खेलेका छन् तर उनीहरुको डिफेन्स पनि राम्रो छ । उनीहरु राम्रो टोली भएकै कारण फाइनलमा छन् ।’
उपाधि जित्ने सपना पूरा गर्न आफू तत्पर रहेको उनले बताए । ‘मेरो लागि उपाधि जित्नु सबथोक हुनेछ । व्यक्तिगत मात्र नभएर टोलीको लागि नै । देशको लागि ऊपधि जित्नुभन्दा सायदै ठूलो केहि होला र त्यो अवसर हामीले भोली पाउँदैछौं ।’
युरोपेली च्याम्पियनसिपको फाइनल नेपाली समयअनुसार आइतबार मध्यरात १२:४५ बजे (सोमबार विहान) सुरु हुनेछ । खेल बर्लिनस्थित ओलम्पिक रंगशालामा हुनेछ ।
