काठमाडौं  – नेपालको त्रिभुवन आर्मी फुटबल क्लबले भारतको प्रतिष्ठित फुटबल प्रतियोगिता डुरान्ड कप खेल्ने भएको छ । आर्मीले यस वर्ष प्रतियोगिताको १३३औं संस्करणमा आमन्त्रित टोलीका रूपमा खेल्ने भएको हो ।

भारतीय राष्ट्रपति द्रौपदी मुर्मुले राष्ट्रपति कार्यालयमा भएको डुरान्ड कप अनावरण कार्यक्रम पश्चात आर्मीको सहभागिता सार्वजनिक भएको थियो ।

आर्मी समूह एफ मा इंडियन सुपर लिगका दुई टोली एफसी गोवा र हैदराबाद एफसी सँगै आईलिग टोली शिलोंग लाजोङ एफसी सँगै रहेको छ । यस समुहका खेल शिलोंगले आयोजक गर्नेछ । खेलहरु जुलाई २७ देखि सुरु हुनेछन् ।

यो त्रिभुवन आर्मी क्लबको लगातार दोस्रो सहभागिता हो । पछिल्लो संस्करणमा पनि आर्मीले सहभागिता जनाएको थियो । सो संस्करणमा ३ खेल मध्य १ बराबरी र २ हार सहित आर्मी समूहको पुछारमा रहेको थियो । आर्मी हैदराबाद र चेन्नाईन सँग पराजित भएको थियो भने दिल्ली एफसी सँग बराबरी खेलेको थियो ।