एजेन्सी – कोपा अमेरिका २०२४ को फाइनल पुग्ने पहिलो लक्ष्यका साथ साविक विजेता अर्जेन्टिना र क्यानडा भिड्दै छन् । खेल नेपाली समय अनुसार बुधबार बिहान ५:४५ बजे न्यूजर्सी स्थित मेटलाईफ स्टेडियममा सुरु हुनेछ ।

यी दुई टोली समूह चरणको पहिलो खेलमा खेलिसकेका छन् । सो खेल अर्जेन्टिनाले २-० ले जितेको थियो ।

दक्षिण र उत्तर अमेरिकी टोली सम्मिलित प्रतियोगितामा क्यानडा एकमात्र बाँकी उत्तर अमेरिकी राष्ट्र रहेको छ । तर साविक विजेता अर्जेन्टिनाका लागि फाइनल यात्रा केही सहज भएको मान्न सकिन्छ । अर्कोतर्फ ब्राजिल, कोलम्बिया र उरुग्वे जस्ता राष्ट्र रहँदा अर्जेन्टिनाले पछिल्लो चरणमा इक्वेडोरमाथि जित्न टाईब्रेकर सहायता लिनुपरे पनि यस यात्रालाई सहज नै मान्नु पर्छ ।

गत खेलमा अर्जेन्टिनाका लागि गोलरक्षक एमी मार्टीनेज नायक बनेका थिए । उनले टाईब्रेकरमा दुई पेनाल्टी बचाएका थिए । स्टार फरवार्ड लियोनेल मेस्सीले आफ्नो पेनाल्टीमा गोल गर्न नसकेपनि अर्जेन्टिना विजयी भयो । पछिल्लो खेलमा चोट सहित खेलेका मेस्सीले राम्रो प्रदर्शन गरेनन् । तर यस खेलमा लागि भने मेस्सी फिट रहेको अर्जेन्टिनी प्रशिक्षक लियोनेल स्कालोनीले खेलको पूर्वसन्ध्यामा बताएका छन् ।

अर्जेन्टिनाका लागि ४ गोल गर्दै सर्वाधिक गोलकर्ताका रूपमा लौतारो मार्टीनेज उभिएका छन् । तर अर्जेन्टिनी सञ्चार माध्यमका अनुसार क्यानडा विरुद्ध अर्का फरवार्ड जुलियन अल्भारेज खेल्ने चर्चा छ । तर त्यसका लागि मार्टीनेज बेन्चमा बस्ने नबस्ने भने टुंगो लागेको छैन ।

उता क्यानडाले पनि पछिल्लो चरणमा भेनेजुएला माथि टाईब्रेकरकै सहायता लिनुपरेको थियो । प्रतियोगिता अगाडि क्यानडा यस चरणसम्म पुग्ने धेरैले आँकलन गरेका त थिएनन् होला तर क्यानडा यस स्थानमा उभिएको छ । अर्जेन्टिना पछि प्रतियोगितामा सबैभन्दा धेरै मौका सिर्जना गर्ने टोली क्यानडा नै रहेको छ।

यस खेलको विजेताले कोलम्बिया र उरुग्वे बीचको अर्को सेमिफाइनल खेलको विजेता विरुद्ध उपाधिका लागि खेल्नेछ ।