गैंडाकोट, जेठ ३२ । मातृ भुमी टोल बिकास संस्था गैंडाकोट नगरपालिका वडा नम्बर ५ ले जेष्ठ नागरिक सम्मान कार्यक्रम २०८१ सम्पन्न गरेको छ। “जेष्ठ नागरिक समाजका गहना हुन, सम्मानित वातावरण सिर्जनामा थप पहल गरौं” भन्ने मूल नाराका साथ यो कार्यक्रम सम्पन्न भएको हो।

शुक्रबार गैंडाकोट स्वास्थ्य चौकी परिसरमा आयोजित यस कार्यक्रममा वडा भित्रका जेष्ठ नागरिकहरूलाई सम्मान गरिएको थियो। कार्यक्रमको अध्यक्षता मातृ भुमी टोल बिकास संस्थाका अध्यक्ष ईश्वर प्रसाद घिमिरेले गर्नुभएको थियो ।

कार्यक्रमका प्रमुख अतिथि गैंडाकोट नगरपालिका वडा नम्बर ५ का वडाध्यक्ष रत्न प्रसाद सापकोटा , विशिष्ट अतिथिमा कार्यपालिका सदस्य शान्ति न्यौपाने र जेष्ठ नागरिक कल्याणकारी परिसद गैंडाकोटका अध्यक्ष मुक्तनाथ न्यौपाने रहनुभएको थियो ।।

कार्यक्रममा बोल्दै प्रमुख अतिथि एवं वडाध्यक्ष रत्न प्रसाद सापकोटाले जेष्ठ नागरिकहरूको योगदानको महत्व र उनीहरूप्रति समाजको दायित्वबारे जोड दिनु भएको थियो । उहाले, “हाम्रा जेष्ठ नागरिकहरू हाम्रो समाजका मूल्यवान सम्पत्ति रहेको र हामीहरुले  उहाँ हरुकोको अनुभव र ज्ञानबाट धेरै सिक्नुपर्ने बताउनुभयो । मातृ भुमी टोल बिकास संस्थाका अध्यक्ष ईश्वर प्रसाद घिमिरेले कार्यक्रमको उद्देश्य बताउँदै , “यो कार्यक्रम जेष्ठ नागरिकहरूप्रति कृतज्ञता व्यक्त गर्ने र उनीहरूको सम्मान गर्ने एउटा साना प्रयास रहेको बताउनु भयो । पछिल्लो समय घर-परिवारमा ज्येष्ठ नागरिक एक्लै हुनुपर्ने परिस्थिति भएको हुँदा उनीहरुलाइ एक्लो पनको महसुस हुन नदिन ज्येष्ठ नागरिक सम्मान कार्यक्रम गरिएको बताउनुभयो । जेष्ठ नागरिक संघ गैंडाकोटका अध्यक्ष मुक्तनाथ न्यौपानेले जेष्ठ नागरिकहरूको अधिकार र सम्मानको पक्षमा आवाज उठाउनु भयो । उहाले , “हाम्रो समाजमा जेष्ठ नागरिकहरूको महत्वपूर्ण भूमिका रहेको र उनीहरूको अनुभव र बुद्धिमत्ता हाम्रो समाजको विकासका लागि अत्यन्त महत्वपूर्ण रहने बताउनु भयो । हामीले उनीहरूको सम्मान गर्नुका साथै उनीहरूको ज्ञान र सीपको उपयोग गर्न सक्नुपर्छ।”

कार्यक्रममा वडा भित्रका सामाजिक सुरक्षा भत्ता पाउने जेष्ठ नागरिक, असहाय र अपाङ्गता भएका नागरिकहरूलाई एक-एक बट्टा मह दिएर सम्मान गरिएको थियो। यो सानो तर अर्थपूर्ण उपहारले जेष्ठ नागरिकहरूप्रति समाजको सम्मान र कदरको प्रतीक बनेको छ।

संस्थापक अध्यक्ष एकनाथ रिजाल, सल्लाहकारहरू केशवप्रसाद सापकोटा, गोविन्द रिमाल, इन्द्रराज पौडेललगायतको कार्यक्रममा उपस्थिति रहेको थियो ।

यस कार्यक्रमले स्थानीय समुदायमा जेष्ठ नागरिकहरूप्रतिको सम्मान र हेरचाहको भावना जागृत गर्न महत्वपूर्ण भूमिका खेलेको छ। यस्ता कार्यक्रमहरूले समाजमा जेष्ठ नागरिकहरूको महत्व र उनीहरूप्रतिको दायित्वबोध बढाउन मद्दत पुर्याउँछन्। आयोजकहरूले यस्ता कार्यक्रमहरू भविष्यमा पनि निरन्तर रूपमा आयोजना गर्ने प्रतिबद्धता व्यक्त गरेका छन्।