गैंडाकोट // गैंडाकोट नगरपालिकाको पशु सेवा शाखाले ६५% अनुदानमा चारा मेसिन तथा बीउ रागो वितरण कार्यक्रम सम्पन्न गरेको छ। नगरपालिकाको ६५% अनुदान र कृषकहरूको ३५% लागतमा गैंडाकोट वडा नं. ८ मा रहेको गैंडाकोट नमुना भैंसी पालक कृषि समूहका २ जना सदस्यलाई बीउ रागो र ९ जना सदस्यलाई चारा मेसिन वितरण गरिएको हो।

सोमबार कृषि उपज केन्द्रमा आयोजित एक कार्यक्रममा गैंडाकोट नगरप्रमुख मदन भक्त अधिकारीले उक्त समग्रीहरू वितरण गर्नुभयो। गैंडाकोट नमुना भैंसी पालक कृषि समूहका अध्यक्ष राम बन्धु पौडेलको अध्यक्षतामा सम्पन्न कार्यक्रममा प्रमुख अतिथिको रूपमा नगरप्रमुख मदन भक्त अधिकारी र विशिष्ट अतिथिको रूपमा वडा नं. ८ का वडाअध्यक्ष प्रेम प्रसाद सापकोटा, पशु सेवा शाखा प्रमुख डा. प्रमोद पौडेल लगायतका व्यक्तिहरूको उपस्थिति रहेको थियो।

कार्यक्रममा बोल्दै नगरप्रमुख अधिकारीले गैंडाकोट कृषिकर्मका लागि उपयुक्त रहेको र यहाँका किसानहरूको हौसला बढाउन यस्ता कार्यक्रम राखिएको बताउनुभयो। उहाँले समग्र नगरपालिकाको विकासमा कृषिले अतुलनीय योगदान पुर्याउने बताउँदै आगामी दिनमा पनि यस्तै कार्यक्रम आयोजना गर्न पशु सेवा शाखालाई आग्रह गर्नुभयो।

त्यसैगरी, वडा नं. ८ का वडाअध्यक्ष प्रेम सापकोटाले वडाभित्र धेरै किसानहरूले भैंसीपालन गरेको तर प्राकृतिक गर्भधारणभन्दा पनि कृत्रिम गर्भधारण गर्ने गरेकाले आफूहरूले सौलियतमा बीउ रागो वितरण गरेको बताउनुभयो। उहाँले यस्ता कामले दीर्घकालीन रूपमा सहयोग गर्ने बताउनुभयो।

पशु सेवा शाखा प्रमुख डा. प्रमोद पौडेलले किसानहरूको मागबमोजिम आफूहरूले सहुलियतमा चारा मेसिन तथा बीउ रागो वितरण गरेको बताउनुभयो। कार्यक्रममा समूहका अध्यक्ष राम बन्धु पौडेलले किसानलाई कामसँग सहयोग पुर्याउने चारा मेसिन र भैंसीको प्राकृतिक गर्भधारणमा सहयोग गर्ने बीउ रागो आफ्नो समूहलाई प्राप्त भएकोमा खुसी व्यक्त गर्दै आगामी दिनमा सबै मिलेर थप काम गर्न सकिने बताउनुभयो। कार्यक्रमको सहजीकरण तिलक प्रसाद कंडेलले गर्नुभएको थियो।

गैंडाकोट नगरपालिकाको यस महत्वपूर्ण कार्यक्रमले स्थानीय किसानहरूलाई भैंसीपालन व्यवसायमा प्रोत्साहित गर्नुका साथै उनीहरूको आय आर्जनमा सहयोग पुग्ने अपेक्षा गरिएको छ। चारा मेसिन र बीउ रागोको वितरणले किसानहरूको लागत कम हुनुका साथै उत्पादन बढ्ने विश्वास गरिएको छ। यसबाट गैंडाकोटको पशुपालन व्यवसाय अझ विकसित हुनेछ भन्ने आशा गरिएको छ।