गैँडाकोट // जयश्री फुड्स प्रा.लि.ले शनिबार आफ्नो स्थापना दिवसको अवसर पारेर रक्तदान कार्यक्रम सम्पन्न गरेको छ। बिहान ६:३० बजेदेखि कम्पनीको प्राङ्गणमा सुरु भएको उक्त कार्यक्रमलाई दिउँसो २ बजेसम्म सञ्चालन गरिएको थियो।

उद्घाटन समारोहका प्रमुख अतिथि गैँडाकोट नगरपालिकाका नगरप्रमुख मदनभक्त अधिकारीले मानव जीवनमा रक्तदान नै सबैभन्दा महान् दान भएको बताउँदै जयश्री फुड्सको पहल सराहनीय रहेको बताउनुभयो। उहाँले सबै नागरिकलाई रक्तदान गर्न आग्रह गर्नुभयो।

त्यसैगरी गैँडाकोट नगरपालिका वार्ड नं. ९ का वडाअध्यक्ष धामनाथ सापकोटाले पनि सम्पूर्ण वडावासीलाई रक्तदानको महत्व बुझ्न र यसमा सक्रिय सहभागी हुन अनुरोध गर्नुभयो। उहाँले जयश्री फुड्सले यसरी वार्षिक रुपमा रक्तदान कार्यक्रम संचालन गरेकोमा धन्यवाद दिनुभयो।

जयश्री फुड्सका संचालक पवन अग्रवालले कार्यक्रमको अध्यक्षता गर्नुभएको थियो। उहाँले ग्रीष्मकालीन समयमा रगतको चरम अभाव हुने गरेकाले आफूहरूले यसलाई नियमित रुपमा गरिरहेको बताउनुभयो। उहाँले वर्षमा कम्तीमा दुई पटक रक्तदान गर्न आग्रह गर्नुभयो।

रक्तदान कार्यक्रममा १२७ जनाले रक्तदान गरेको जयश्री फुड्सका व्यवस्थापक अमित अग्रवालले बताउनुभयो। जसमा पुरूष ११९ जना र महिला ८ जना रहेका छन्। ४५ जनाले पहिलोपटक जयश्री फुड्स प्रा.लि ले आयोजना गरेको रक्तदान कार्यक्रम मार्फत रक्तदान गरेका छन्।

उल्लेखनीय रुपमा यस रक्तदान कार्यक्रममा स्थानीय समुदायको उत्साहजनक सहभागिता रहेको थियो। नगरप्रमुख अधिकारी, जयश्री फुड्सका संचालकहरू लगायतका व्यक्तित्वहरूको उपस्थितिका साथै विभिन्न वडाका जनप्रतिनिधिहरूको पनि सक्रिय सहभागिता रहेको थियो। नेपाल रेडक्रस सोसाइटी, रक्तसञ्चार सेवा केन्द्र र नवजागरण ग्रामीण विकास केन्द्रको सहयोगमा सम्पन्न रक्तदान कार्यक्रमबाट जयश्री फुड्सले सामाजिक उत्तरदायित्व निर्वाह गर्दै स्थानीयलाई पनि मानवीय सेवामा सामेल गराएको देखिन्छ।