भरतपुर //  मिस नेपाल २०२४ को चितवन अडिसन आगामी चैत ३० गते भरतपुरमा हुने भएको छ। दि हिडन ट्रेजरले बुधबार भरतपुरमा आयोजित पत्रकार सम्मेलनमार्फत यस बारेमा जानकारी गराएको हो।

निर्देशक सुवर्ण क्षेत्रीका अनुसार चितवन अडिसन भरतपुर गार्डन रिसोर्टमा बिहान ९:३० बजेबाट सुरु हुनेछ। १८ देखि २७ वर्षका अविवाहित युवतीहरु न्युनतम ५ फिट ३ इन्च उचाई र दश जोड दुई उतिर्ण भएको हुनुपर्नेछ।

देशका ९ वटा शहरमा हुने अडिसनबाट प्रतियोगिताका लागि प्रतिस्पर्धीहरु छनोट गरिनेछन्। आवेदन शुल्क लाग्ने छैन। मी  १८ मा काठमाडौंमा फाइनल अडिसन हुनेछ र तयारीपश्चात् मिस नेपाल वर्ल्ड, मिस नेपाल अर्थ र मिस नेपाल इन्टरनेसनल घोषणा गरिनेछ।

फाइनल प्रतियोगिता भने अगस्ट ३ मा हुनेछ। सबै २५ जना प्रतिस्पर्धीहरुलाई मिस नेपाल बनाउने लक्ष्य रहेको पनि क्षेत्रीले बताउनुभयो। पत्रकार सम्मेलनमा मिस नेपाल वर्ल्ड २०२३ सृच्छा प्रधान, मिस नेपाल इन्टरनेसनल प्रसिद्धि शाह, स्थानीय संयोजक नेपाल डायरिजका प्रवन्धक बिनेश थापालगायत सहभागी थिए।