गैँडाकोटः नवलपरासी जिल्लाको गैँडाकोट नगरपालिकाबाट देशभरका ७५३ पालिकामध्ये पहिलोपटक केन्द्रीकृत नागरिकता सूचना व्यवस्थापन प्रणाली (सिसिआइएमएस) को शुभारम्भ भएको छ। बिहीबारदेखि यस प्रणालीमार्फत स्थानीय तहहरूले केन्द्रीय निकायहरूलाई नयाँ नागरिकता प्रमाणपत्र जारी गर्न अनलाइनबाटै सिफारिस गर्न थालेका छन्।

गैँडाकोट नगरप्रमुख मदनभक्त अधिकारीले प्रकृति सापकोटाको नागरिकता सिफारिस पत्रको प्रतिलिपि अनलाइन प्रणालीमा अपलोड गरी शुभारम्भ गर्नुभएको छ। उहाँले यस प्रणालीले नागरिकलाई सहज सेवा प्रदान गर्ने बताउनुभयो। आगामी दिनमा राष्ट्रिय परिचयपत्र लगायतका परिचयपत्रहरू पनि यसैगरी जारी हुने विश्वास व्यक्त गर्नुभयो।

प्रमुख जिल्ला अधिकारी कल्पना श्रेष्ठले यस प्रणालीले सेवा प्रवाह छिटो हुने र झुटा विवरण भरेर नागरिकता लिने कार्यको अन्त्य हुने विश्वास व्यक्त गर्नुभएको छ। गैँडाकोट नगर उपप्रमुख शान्ति कोइरालाले  यसले दोहोरो नागरिकता र वडा कार्यालयको सेवा प्रवाहलाई चुस्त पार्ने बताउनुभएको छ।

यस अनलाइन सिफारिस प्रणालीका लागि बुवा-आमाको नागरिकता, जन्मदर्ता, विवाह प्रमाणपत्र, बसाईसराई, शैक्षिक प्रमाणपत्र लगायतका कागजातहरू आवश्यक पर्ने गैँडाकोट नगरपालिकाका अधिकारीहरूले जानकारी गराएका छन्। गृह मन्त्रालयले क्रमिक रूपमा देशभरका अन्य पालिकाहरूमा पनि यसलाई लागू गर्ने योजना बनाएको छ।

नागरिकता वितरण कार्य तथा अभिलेख व्यवस्थापनलाई व्यवस्थित र प्रविधिमा आधारित बनाउन सुरु गरिएको यो प्रणालीले झन्झटरहित, पारदर्शी र विश्वसनीय नागरिकता सेवा प्रवाहमा टेवा पुर्याउनेछ। सफल कार्यान्वयनका लागि स्थानीय तह र केन्द्रीय निकायबीचको समन्वय तथा जनशक्ति र प्रविधिको परिचालन महत्त्वपूर्ण हुनेछ।