गैंडाकोट : गैंडाकोट नगरपालिका वडा नम्बर ६ ले सडक सुरक्षालाई प्राथमिकता दिँदै वडाभित्रका विभिन्न चोकहरूमा जेब्रा क्रसिङ निर्माणको अभियान सुरु गरेको छ। शनिबार कालिका चोकमा ६ वटा स्थानहरूमा जेब्रा क्रसिङ निर्माण गरिएको छ।
दुर्घटना न्यूनीकरण गर्नको लागि गैंडाकोट नगरपालिका वडा नम्बर ६ को आयोजनामा इलाका ट्राफिक कार्यालय गैंडाकोटको समन्वयमा वडा भित्रका विभिन्न चोक हरुमा ट्राफिक मापदण्ड अनुरुप का जेब्रा क्रसिङ बनाउन लागिएको वडा अध्यक्ष सुबास चापागाईंले बताउनु भयो । चापागाईंका अनुसार, सडक सुरक्षाको बारेमा राम्रो ज्ञान नहुँदा वार्डभित्र पटक-पटक दुर्घटना हुने गरेकाले पछिल्लो समय आफूहरू सडक सुरक्षामा केन्द्रित रहेका बताउनु भयो ।
यस्तै,इलाका ट्राफिक कार्यालय गैंडाकोटका प्रमुख तथा प्रहरी वरिष्ठ नायब निरीक्षक लेखनाथ पुरुले गैंडाकोट ६ ले सराहनीय कार्य गरेको प्रति धन्यवाद ब्यक्त गर्दै यि यस्ता काममा ट्राफिक प्रहरी सधै हातेमालो गर्न तयार भएको बताए ।
जेब्रा क्रसिङले सवारी दुर्घटना न्यूनीकरणमा महत्वपूर्ण भूमिका खेल्ने विश्वास गरिएको छ। ट्राफिक प्रहरीले पनि जेब्रा क्रसिङको प्रयोग गरी यात्रा गर्न सर्वसाधारणलाई आग्रह गरेका छन्। वडा नम्बर ६ को यो अभियानले सडक सुरक्षा प्रवर्द्धन गर्नुका साथै सुरक्षित आवागमन व्यवस्थापनमा पनि मद्दत पुग्नेछ।
स्थानीय सरकारले यसरी सडक सुरक्षा अभियानलाई प्राथमिकता दिनु अत्यन्तै सराहनीय कदम मानिएको छ। यस्ता अभियानले सर्वसाधारण नागरिकको दुर्घटनाजन्य क्षति न्यूनीकरण गर्न पनि मद्दत पुग्नेछ। अन्य स्थानीय सरकार र संघीय सरकार पनि यस्ता अभियानहरू सञ्चालन गरी जनसुरक्षा अभिवृद्धि गर्नुपर्दछ।
