भरतपुर । भरतपुरमा आयोजित लोक नृत्य प्रतियोगितामा भरतपुर–११ को सिद्धिविनायक मावि पहिलो भएको छ । भरतपुर–५ गुलाफबागमा रहेको भद्रकुमारी राष्ट्रिय आधारभूत विद्यालयको ३५औँ वार्षिकोत्सव तथा अभिभावक दिवसको पूर्वसन्ध्यामा विद्यालयले जिल्लास्तरीय लोक नृत्य प्रतियोगिताको आयोजना गरेको थियो ।
आइतबार भएको प्रतियोगितामा भरतपुर–१२ को ग्रीनल्याण्ड पब्लिक आवासीय मावि दोस्रो तथा भरतपुर–१० को अर्किड इङ्ग्लिस स्कुल तेस्रो भएका छन् । प्रतियोगितामा भरतपुर–७ को सनराइनज इङ्ग्लिस स्कुलले सान्त्वना स्थान हासिल गरेको छ । प्रतियोगितामा जिल्लाका संस्थागत र सामुदायिक गरी ३४ विद्यालयहरुको सहभागिता रहेको भद्रकुमारी राष्ट्रिय आधारभूत विद्यालयका प्रधानाध्यापक राजेन्द्रप्रसाद चालिसेले जानकारी दिनुभयो ।
भरतपुर–५ का वडाध्यक्ष युद्धप्रसाद श्रेष्ठ प्रमुख अतिथि रहनुभएको कार्यक्रमको अध्यक्षता भद्रकुमारी राष्ट्रिय आधारभूत विद्यालयका विद्यालय व्यवस्थापन समिति अध्यक्ष राजुप्रसाद श्रेष्ठले गर्नुभएको थियो । यसैबीच, विद्यालयले फागुन ७ गते विविध कार्यक्रम गर्दै आफ्नो ३५औँ वार्षिकोत्सव कार्यक्रमको समापन गर्दैछ । वार्षिकोत्सव समापन कार्यक्रममा सांस्कृतिक कार्यक्रम एवं अभिभावक खेल तथा चियापानका साथै पुरस्कार वितरण एवं सम्मान कार्यक्रम सञ्चालन हुने विद्यालयले जनाएको छ ।
कार्यक्रम सञ्चालन सहायक प्रधानाध्यापक रोजिना न्यौपानेले गर्नुभएको थियो ।
