चितवन, माघ ३- भरतपुर महानगरपालिकाकी मेयर रेनु दाहालले भरतपुरमा महसुस हुने गरी विकास भएको बताएकी छन् ।
हिमालय दण्डपाणि न्यौपाने माध्यमिक विद्यालय भरतपुर–१३ को ४४ औं वार्षिकोत्सव कार्यक्रमलाई सम्बोधन गर्दै उनले भरतपुरमा जनताले आफै महसुस हुने गरी विकास भएको उल्लेख गरिन् । ‘हामीले बोलेका कुरा पूरा गरेका हौ’, उनले भनिन्,‘हामीले भरतपुरमा विकास भयो भन्नुपर्दैन । भरतपुरबासीले महसुस भएको कुरा आफै भनिरहनु भएको छ । यसमा हामीलाई गर्व छ ।’
मेयर दाहालले भरतपुरमा सडक पूर्वाधारको विकास नभई सबै क्षेत्रमा समानुपातिक विकास भएको दाबी गरिन् । अन्य ठाउँबाट भरतपुर आउने व्यक्तित्वले भरतपुरमा भइरहेको विकासलाई मुक्तकण्ठले प्रशंसा गर्ने गरेकाले यस विषयमा सन्तुष्ट रहेको उनको भनाइ छ ।
भरतपुरको शिक्षा, स्वास्थ्य, पर्यटन, खेलकुद, कृषिलगायतको क्षेत्रमा अनुभूति हुने गरी विकास भएको भरतपुर जनताले खुलेरै भन्ने गरेको उनले बताए ।
‘सत्य कुरा लुक्दैन’, उनले भनिन्,‘ भरतपुरको विकास पहिलाको अवस्था के थियो र अहिले कस्तो भएको छ । यो कुरा घाम जस्तै छर्लङ्ग छ ।’
मेयर दाहालले भरतपुरका सामुदायिक विद्यालयमा ६ वर्षको अवधिमा ८ हजार विद्यार्थी बढ्नु शिक्षा क्षेत्रमा भएको ठूलो उपलब्धि भएको धाराणा राखिन् । नेपाल सरकारको शिक्षा मन्त्रालयले प्रकाशित गरेको नमुना विद्यायको नतिजामा भरतपुरका धेरै विद्यालयहरु समावेश हुनु यहाँ भएको शैक्षिक विकासलाई प्रष्ट पारेको उनको भनाइ छ ।
कार्यक्रमलाई सम्बोधन गर्दै विद्यालय व्यवस्थापन समितिका अध्यक्ष गोपालकृष्ण न्यौपानेले महानगरपालिकाले शिक्षा क्षेत्रमा धेरै नमुना कार्यहरु गरेको बताए । महानगरपालिकाको साथ र सहयोगबाट विद्यालयलाई देशकै नमुना विद्यालय बनाउन सकिएको धारणा राखे। कार्यक्रममा विद्यालयको समग्र विकासमा योगदान पु¥याउने व्यक्तित्वहरुलाई सम्मान गरिएको थियो । कार्यक्रममा वडा नम्बर १३ का अध्यक्ष प्रकाश दवाडी, जिल्ला शिक्षा इकाइका प्रमुख भूमिलाल सुवेदीले मन्तव्य राखेका थिए ।
