काठमाडौं, मंसिर २- आजदेखि राष्ट्रिय स्वतन्त्र पार्टी (रास्वपा)का सांसदले घरदैलो कार्यक्रम गर्दै छन् । घरदैलो कार्यक्रमका लागि रास्वपा सभापति रवि लामिछानेले हिजो नै आफ्नो निर्वाचन क्षेत्र पुगेका छन् । चितवन २ अन्तर्गत पर्ने इच्छाकामना गाउँपालिका–२ मायाटार पुगेर उनले लामो समयदेखि अलपत्र परेको विद्युत विस्तारको काम अगाडि बढाउन विद्युत प्राधिकरणका कर्मचारीलाई आग्रह गरे ।
निर्वाचन भएको एक वर्ष पुगेको अवसरमा आजदेखि तीन दिने घरदैलो कार्यक्रम गर्न लागेको सहमहामन्त्री कविन्द्र बुर्लाकोटीले जानकारी दिए । कार्यक्रमका क्रममा जनताका सुझाव र गुनासा सुन्ने उनले बताए । प्रत्यक्ष निर्वाचनतर्फका उम्मेदवार आफ्नो निर्वाचन क्षेत्रमा घरदैलो गर्नेछन् । समानुपातिक तर्फका सांसदले आफ्नो जिल्ला केन्द्रित भएर कार्यक्रम तय गर्ने सहमहामन्त्री बुर्लाकोटीले बताए ।
