काठमाडौं : नेपालका विभिन्न क्षेत्रका कलाकारहरुले सोमबार आ-आफ्नै तरिकाले फागूपर्व (होली) मनाएका छन् ।
थुनामुक्त भएपछि अभिनेता पल शाहले काठमाडौंस्थित निवासमै सपरिवार होली मनाएका छन् । उनीसँग होली मनाउन उनी निकट फिल्म र संगीतकर्मी पुगेका थिए ।
यता महानायक अभिनेता राजेश हमालले कपुरधारास्थित निवासमा आइपुगेका फिल्मकर्मीसँग रङ साटासाट गर्दै होली मनाएका छन् ।
फिल्म ‘छक्कापञ्जा ४’को टीमले यो वर्ष बानेश्वर चोकमा ‘छक्कापञ्जा ४ होली विशेष कार्यक्रम’ आयोजना गरी सर्वसाधारणसँग मिलेर होली मनाएको छ ।
कार्यक्रममा निर्मल शर्मा, दीपाश्री निरौला, बेनिशा हमाल, केदार घिमिरे, राज आचार्यलगायतका कलाकारहरु उपस्थित थिए ।
अभिनेत्रीद्वय रेखा थापा र श्वेता खड्काले सँगै अनि अभिनेत्री मनीषा कोइरालाले सपरिवार होली मनाएका छन्। मनीषासँग होली मनाउन कांग्रेस नेतृ सुजाता कोइराला पनि पुगेकी थिइन् ।
गायकहरु प्रमोद खरेल, कुलेन्द्र विश्वकर्मा, राजेशपायल राई लगायतले रेडियोको होली कार्यक्रममा भाग लिएर फागु पर्व मनाएका छन् ।
कलाकारहरु रचना रिमाल, वर्षा राउत, वर्षा शिवाकोटी, शुभेच्छा खड्का, सञ्चिता लुइटेल, मिस नेपाल प्रियंकारानी जोशीले पनि परिवार र साथीहरुसँग होली मनाए ।
