२१ फाल्गुन,चितवन
भरतपुर ११ स्थित ज्ञानदर्शन बोर्डिङमा निशुल्क स्वास्थ शिविर सम्पन्न भएको छ । मनकामना अस्पतालको प्राविधिक सहयोगमा आईतबार विद्यालयमा आयोजित शिविरमा विद्यार्थीहरूको निशुल्क स्वास्थ्य परीक्षण गरिएको हो । वरिष्ठ बालरोग तथा नवजात शिशु रोग विशषज्ञ चिकित्सक वि.आर. चौधरी लगायत अस्पतालमा कार्यरत स्वास्थ्यकर्मीको टोलीद्वारा गरिएको स्वास्थ्य परीक्षणले विद्यालयमा रहेका नर्सरी र केजीमा अध्ययनरत १२० जना विद्यार्थी प्रत्यक्ष लाभान्वित भएका थिए।
निशुल्क स्वास्थ्य परीक्षणमा स- साना विद्यार्थीहरूको नाक,कान, घाँटी,पेट,आँखा,आदिको चेकजाँच गरिएको थियो। विद्यालयमा भएको शिविरले बालबालिकालाई लाभ हुनेमा आफू विश्वस्त रहेको तथा अभिभावकहरु बालबालिकाको स्वास्थ्यमा सचेत हुनुपर्ने प्राचार्य मनिष घिमिरेले बताउनुभयो। उहाँले बढ्दो व्यस्तताका कारण परिवारमा समय दिन नसकेकाले बालबालिकामा सानैबाट रोग लाग्ने गरेको बताउनुभयो।साथै प्राचार्य घिमिरेले अभिभावकले आफ्नो बालबालिकाको नियमित स्वास्थ्य परीक्षण गर्न समेत आग्रह गर्नुभयो।
आफ्नो विद्यालयमा शिविर आयोजना गरेकोमा अस्पताललाई धन्यवाद दिँदै घिमिरेले आगामी दिनहरूमा पनि शिविरलाई निरन्तरता दिनुपर्नेमा जोड दिनुभयो। बिहान दश बजेबाट शुरुभएको शिविर दिउँसो तीन बजेसम्म चलेको थियो। बिद्यालयले शिविरमा सहभागी चिकित्सकको टोली संगै मनकामना अस्पतालका प्रशासकीय अधिकृत अरुण पौडेललाई सम्मान स्वरुप मायाको चिनो प्रदान गरेको थियो।मायाको चिनो ग्रहण गर्दै अस्पतालका प्रशासकीय अधिकृत पौडेलले शिविर सफल बनाउन भूमिका खेल्ने सम्पूर्णलाई धन्यवाद व्यक्त गर्नुभयो।स्वास्थ सेवा संगै सामाजिक उत्तरदायित्वमा अस्पताल कटिबद्ध रहेको पौडेलको भनाई छ।
