काठमाडौँ । नुवाकोट शिवपुरी गाउँपालिकाका एक अधिकृत जोसमा होस् गुमाएपछि प्रहरी फन्दामा परेका छन् । सरकारी मोटरसाइकल लिएर मसाज पार्लर पुगेपछि शिवपुरी गाउँपालिकामा कार्यरत आठौँ तहका अधिकृत तथा पूर्व प्रशासकीय प्रमुख ज्ञानेन्द्र भट्ट प्रहरी फन्दामा परेका हुन् ।
स्थानीयले खबर गरेपछि प्रहरीले मसाज पार्लरमा पुगेर बागमती प्रदेश ०२–००१ ब ३८१८ नम्बरको मोटरसाइकलसहित ती अधिकृतलाई नियन्त्रणमा लिइएको जिल्ला प्रहरी परिसर ललितपुरका प्रवक्ता डिएसपी अंगुर जिसीले जनाएका छन् ।
नियन्त्रणमा लिइएका सवारीसाधन र मानिसको बारेमा बुझ्ने काम भइरहेको प्रहरीले जनाएको छ ।
सोमबार अपराह्न २ः३० बजे बखुण्डोलमा रहेको गोल्डेन डोर सफ्ट स्पा एण्ड ब्यूटीमा पुगेका ती सरकारी कर्मचारीलाई प्रहरीले मोटरसाइकलसहित नियन्त्रणमा लिएको हो ।
बखुण्डोलका स्थानीयले खबर गरेपछि पुगेको प्रहरीले अपराह्न ४ः ३० बजे मोटरसाइकलसहित मानिसलाई नियन्त्रणमा लिएको हो ।
शिवपुरी नगरपालिका नुवाकोटका प्रमुख गोविन्द प्रसाद थपलियाले उक्त मोटरसाइकल आफ्नै कार्यालयको नाममा रहेको भन्दै कुन कर्मचारीले प्रयोग गरिरहेको छ बुझ्नुपर्ने बताएका छन् ।
कार्यालय समयमा सरकारी मोटरसाइकल लिएर मसाज पार्लरमा पुग्नु यो सरासर गलत भएको भन्दै सरकारी सवारीसाधनको दुरुपयोग गर्नेलाई नियमानुसार कारवाही गर्ने थपलियाले जनाए ।
