चितवनको इच्छाकामनामा बस र विङगर आपसमा ठोक्कियो, १६ जना घाइते

चितवन – चितवनको इच्छाकामना गाउँपालिका ३ चुम्लिङटारमा बस र विङगर गाडी आपसमा ठोक्किदा १६ जना घाइते भएका छन् ।

आज (बिहीबार) साँझ ७:२० बजे चुम्लिङटारस्थित पृथ्वी राजमार्गमा काठमाडौंबाट बझाङतर्फ जाँदै गरेको ना ६ ख १३४० नम्बरको बस र भैरहवाबाट काठमाडौंतर्फ जाँदै गरेको लु २ ख ३५०२ नम्बरको विङगर आपसमा ठोक्किएका हुन् ।

दुर्घटनामा विङगर चालकसहित दुबै सवारी साधनमा सवार १६ जना घाइते भएको जिल्ला प्रहरी कार्यालय चितवनले जानकारी दिएको छ । घाइतेहरुलाई उपचारका लागि भरतपुर ल्याईएको छ ।

दुबै सवारी साधन घटना स्थलमा नै रहेको प्रहरीले जनाएको छ । बस चालक ईलाका प्रहरी कार्यालय मुग्लिनको नियन्त्रणमा रहेका छन् ।