परासी : नवलपरासीको रामग्राम नगरपालिका-३ मा गाईपालन गर्ने किसानले मासिक एक हजार रूपैयाँ पाउने भएका छन्।

वडा कार्यालयका अनुसार गाईको स्याहारसुसार गर्नका लागि मासिक एक हजार रूपैयाँ दिने निर्णय गरिएको छ। हिन्दुहरूको आस्थाका रूपमा रहेको गाई धेरैले पाल्न छाडेकाले त्यसलाई प्रोत्साहन गर्न रकम उपलब्ध गराउन लागिएको वडाअध्यक्ष उज्जवल न्यौपानेले बताए। उनी राप्रपाबाट नवनिर्वाचित वडाध्यक्ष हुन्।

वडाले २० जनालाई रासन कार्डको व्यवस्था गर्न लागेको पनि उनले बताए। रासन कार्ड पाउनेमा पूर्ण अशक्त भएका ६ जना अपाङ्ग र १४ जना अति विपन्नका जेष्ठ नागरिक रहेका छन्।

उनीहरूलाई मासिक रूपमा १ हजार बराबरको दाल, चामललगायतका खाद्य सामग्री उपलब्ध गराइने छ। कार्डको आधारमा उनीहरूले तोकिएको पसलमा गएर मासिक रूपमा खाद्य सामग्री लिन सक्ने अध्यक्ष न्यौपानेले जानकारी दिए।

त्यसैगरी वडामा रहेका अति विपन्न परिवारलाई ग्यास चुल्हो उपलब्ध गराइनेछ। उपलब्ध गराइएको चुल्होमा वर्षको एक पटक वडाले निःशुल्क ग्यास भरिदिने न्यौपानेले बताए।

त्यस्तै ५ जनाको समूह बनाएर आउने महिलाहरूलाई बाख्रा पालनका लागि ५० हजारका दरले आर्थिक सहयोग गरिने छ। वडालाई सफा र स्वच्छ बनाउने अभियानअन्तर्गत २ स्थानमा सार्वजनिक शौचालय निर्माण गर्न लागिएको छ।

सदरमुकामको व्यस्त बजार क्षेत्रमा पर्ने उक्त वडा भएकाले पनि बाहिरबाट आउने सर्वसाधारणको सुविधाका लागि शौचालय निर्माण गर्न लागिएको न्यौपानेको भनाइ छ।