चितवन – पवित्र धार्मिकस्थल देवघाटमा आज (आइतबार) देखि साउने मेला सुरु भएको छ । आजबाट सुरु भएको मेला महिनाभरसम्म चल्नेछ ।पहिलो दिन आज बिहानैबाट देवघाटमा स्नान गर्न आउनेको भिड लागेको छ ।

देवघाटमा स्नान र पूजा आराधनाका लागि गए रातिदेखि नै भक्तजनहरु आउने क्रम सुरु भएको देवघाट क्षेत्र विकास समितिका अध्यक्ष बद्री अधिकारीले बताए।

भोलि (सोमबार) देखि बोलबम मेला लाग्नेछ । कोभिडका कारण बिगतका दुई वर्ष नलागेकोले यस वर्ष मेलामा उत्साह थपिने उनले बताए । यस वर्ष पाँच लाख भक्तजन मेला भर्न आउने अनुमान गरिएको छ ।

यस वर्ष साउनमा पाँच वटा सोमबार पनि परेको छ । यसले भक्तजनको आवागमन बढ्ने उनको विश्वास छ । ‘यस वर्ष पाँच वटा सोमबार पनि परेको छ । दुई बर्षदेखि मेलामा आउन नपाएका भक्तजनहरु उल्लेखिय संख्यामा आउनुहुन्छ’, उनले भने । कोरोना बढेर बीचमा प्रशासनबाट कुनै आदेश नभए हरेक सोमबार एक लाखको हारहारिमा भक्तजन आउने उनको अनुमान छ । ‘अहिले फेरी कोरोना बढेको संकेत देखिएको छ। बीचमा कोरोनाका कारण कुनै आदेश नभए सो संख्यामा भक्तजन आउनुहुन्छ’, उनले भने ।
।

सोमबार लाग्ने बोलबम मेलाका लागि तयारी थालिएको उनले जानकारी दिए । मेलामा आउने भक्तजनको सहजताका लागि चितवन र तनहुँ दुबैतर्फ उज्यालो बत्तिको व्यवस्था गरिएको छ ।

नदीमा पानीको बहाव बढ्न सक्ने सम्भावनालाई मध्यनजर गर्दै डुङ्गा, उद्धार टोलि, तीन वटा इमेर्जेन्सी बोर्ड, तार जाली, स्नान गर्ने ठाँउमा डोरी राखिएको उनले बताए ।

त्यस्तै भिडभाडलाई व्यवस्थित गर्न जिल्ला प्रशासन कार्यालय, प्रहरी कार्यालय र ट्राफिक कार्यालयसँगको समन्व्यमा चितवन नवलपरासी र तनहुँको सिमानामा सुरक्षाकर्मीहरु परिचालन गरिएको उनले बताए ।

देवघाटमा चितवन नवलपरासी, रुपन्देही, मकवानपुर, लमजुङ्ग, गोर्खा, धादिङ्ग, प्रदेश १ का विभिन्न जिल्लासहित भारतबाट समेत भक्तजन आउने गर्दछन् ।देवघाटको पवित्र जल र बेलपत्रले शिवको पूजा आराधना गरे आफ्नो मनोकामना पूरा भई सुख शान्ति मिल्ने विश्वास छ ।

हिन्दू धर्म अनुसार साउन महिनालाई वर्षकै सबैभन्दा चोखो महिनाका रूपमा लिने गरिन्छ । साउन महिनाभर श्रद्धालुले चोखो गरी पूजा आराधना गरेर विशेषरूपमा मनाउने गर्छन् ।यो समयमा महिला हरियो कपडा र चुरा तथा मेहन्दीमा सजिने र व्रत बस्ने गर्छन् ।