ब्रिजबेन,अष्ट्रेलिया । अष्ट्रेलियामा मङ्कसिपक्सको संक्रमण बढ्दो क्रममा पाइएको छ । अहिलेसम्म २८ जनामा यो भाइरसको संक्रमण पुष्टि भएको हो । बुधबार अष्ट्रेलियन क्यापिटल टेरिटोरी (एसिटी) मा मङ्किपक्सको २ जनामा मङ्किपक्सको संक्रमण पुष्टि भएसँगै यो संक्रमण विस्तार भैरहेको पुष्टि भएको छ ।

संक्रमितको संख्या बढेको भएता पनि अहिले नै चिन्ता लिनुपर्ने अवस्था भने नभएको स्वास्थ्य अधिकारीहरूले बताएका छन्। अष्ट्रेलियामा मे २० तारिखमा पहिलो पटक मङ्किपक्स संक्रमण पुष्टि भएको थियो। अहिलेसम्म न्यु साउथ वेल्समा सबैभन्दा बढी १७ जनामा संक्रमण पुष्टि भएको छ। सोमबार मात्रै क्विन्सल्याण्डमा यो भाइरसको संक्रमण पुष्टि भएको थियो। यो भाइरसको अहिलेसम्म कुनै उपचार पद्धति पत्ता लागेको छैन। यद्यपी २ देखि ४ हप्तामा यो भाइरसका लक्षणहरू स्वतः हराएर जानेगरेको पाइएको छ ।

११ वटा अफ्रिकन मुलुकमा भने यो भाइरसलाई खतरनाक मानिन्छ। यो भाइरसको संक्रमणपछि अफ्रिकी मुलुकहरुमा ३ देखि ६ प्रतिशत बिरामीको मृत्यु हुने गरेको छ। यो भाइरसको उत्पति समेत यीनै मुलुकबाट भएको आँकलन गरिएको छ ।