गैंडाकोट नगरपालिका वडा नं ५ मा रहेको साइनिङ्ग आवासिय माध्यमिक बिद्यालय आई एस ओ सर्टिफाईड भएको छ । आईतवार विद्यालय परिसरमा एक समारोहको आयोजना गरि बिद्यालयले आई एस ओ सर्टिफाईड भएको खुसीमा बधाई एवं सम्मान उत्सव कार्यक्रम विद्यालयका शिक्षाक, विद्यार्थी, अभिभावक र समाजका लब्धप्रतिष्ठित जनसमुदायहरूसँग गरेको थियो। बिद्यालयले यसअघि पनि ब्रिटिस काउन्सिलबाट ‘इन्टरनेशनल स्कुल अवार्ड २०२०-२३’ हाँसिल गर्न सफल भएको थियो ।
कुरियरबाट प्राप्त हुन आएका अवार्ड र बिभिन्न सर्टिफिकेटहरुलाई नगरप्रमुख तथा समारोहका प्रमुख अतिथी मदनभक्त अधिकारीले बिद्यालयका प्रधानाध्यापक लक्ष्मी दवाडी, संचालिका ईन्दिरा चापागाई र शिक्षक शिक्षिकाहरुलाई हस्तान्तरण गर्नु भएको थियो ।
बिद्यालयका प्रधानाध्यापक लक्ष्मी दवाडीले सुरुवाती दिनहरू बिद्यालय संचालन गर्न कठिन भएको सम्झिदै तर पछि यहाँवाट पढेर गएका विद्यार्थीहरु कोही अमेरिकाको नासामा वैज्ञानिक भएको, कोही डाक्टर, कोही सरकारी उच्च ओहोदाका कर्मचारी र कोही ईञ्जिनियर आदि बनेका कारण आज विद्यालयले वडा नं. ५ बाट पुरै गैंडाकोट नगरपालिका, नवलपुर जिल्ला, नेपालभरी हुँदै अहिले अन्तराष्ट्रिय स्तरमै प्रसिद्धि पाएको बताउनुभयो । उहाँले यहाँका विद्यार्थीहरुले भारत र अमेरिकाका विद्यार्थीहरुसँगपनि प्रतिस्पर्धा गरेकै कारण आज आईएसओ सर्टिफाईड हुँदै बिभिन्न अवार्डहरु पाएको बताउनुभयो ।
विद्यालय व्यवस्थापन समितिका अध्यक्ष प्रेमप्रसाद अधिकारीको अध्यक्षतामा भएको उक्त कार्यक्रममा इन्दिरा चापागाईले स्वागत मन्तव्य व्यक्त गर्नुभएको थियो । कार्यक्रमको संचालन शिक्षक कपिल लामिछाने गर्नुभएको थियो ।
