काठमाडौं : काठमाडौं महानगरपालिकाका मेयर बालेन्द्र साहले महानगरपालिकाको हरेक ठाउँमा थुप्रिएको फोहोर व्यवस्थापनका लागि सरोकारवालाहरुसँगको भेटलाई तीब्रता दिइरहेका बेला वडा नम्बर १६ का वडाअध्यक्ष मुकुन्द रिजाल भने आफैं फोहर उठाउन लागि परेका छन् । ल्यान्डफिल्ड साइटको अवरोधका कारण सडकमै फोहोर थुप्रिएर पुरै महानगरपालिका दुर्गन्धित भएपछि  वडाअध्यक्ष  रिजालले सोर्हखुट्टे क्षेत्रको फोहोर आफैं उठाएका हुन् ।

महानगरको संयन्त्रले वातावरण विभागले फोहोर उठाउन नसकेपछि वडा अन्तर्गत रहेका महानगरको गाडी प्रयोग गरेर रिजालले फोहोर उठाउन लगाएका छन् ।

उनले फोहोर सङ्कलनको काम वडाको नभई महानगर अन्तर्गतको भए पनि सडकमा फोहोर नउठेपछि आफैं फोहोर उठाउन निस्किएको बताए ।

काठमाडौँ महानगरको पहिलो कार्यपालिका बैठकमा बैठकको पद्धतिबारे प्रश्न उठाएपछि मेयर बालेन्द्रका शुभेच्छुकहरूले काम गर्न अवरोध पुर्‍याउने प्रयास गरेको भनेर उनको विरोध गरेका थिए ।

मेयर बालेन्द्रले बैठक अगावै निर्णय गरेको भन्दै बैठकको प्रक्रिया र पद्धतिमा बस्न उनले गरेको आग्रहका कारण उनको आलोचना भएको थियो ।