सुर्खेतको चिङ्गाड गाउँपालिकामा सामाजिक सुरक्षा भत्ता बुझ्नका लागि डोकोमा सवार एक  वृद्धको भिरबाट लडेर मृत्यु भएको छ ।

वडा नं. २ काफलकाँडाका नन्दवीर खड्काको सामाजिक सुरक्षा भत्ता बुझेर फर्किंदै गर्दा मृत्यु भएको वडाध्यक्ष प्रेमबहादुर खड्काले जानकारी दिए । बुधबार दिउँसो करिब ३ बजेतिर खड्काको मृत्यु भएको हो ।

वडाअध्यक्ष खड्काका अनुसार अन्दाजी ८०/८५ वर्षीय खड्कालाई वडा नं. ३ स्थित ठाँटी बजारमा रहेको सानीमा बैंकको शाखामा भत्ता बुझ्नका लागि उनका छोराहरूले डोकोमा बोकेर लगेका थिए ।

घर फर्किनेक्रममा चिङ्गाड खोलाको राजीकुना भन्ने ठाउँमा बोक्ने व्यक्ति (छोरा) को खुट्टा चिप्लिँदा दुवै जना लडेका थिए । वृद्ध खड्काको घटनास्थलमै मृत्यु भएको र छोरालाई भने सामान्य चोट लागेको वडाध्यक्ष खड्काले जानकारी दिए ।

गाउँपालिका अध्यक्ष बोधविक्रम जिसीले गाउँपालिका भौगोलिक हिसाबले विकट भएकाले सामाजिक सुरक्षा बुझ्न बैंकसम्म आइपुग्ने नागरिकहरूले सास्ती खेप्नु परेको बताए । सम्बन्धित वडाबाटै भत्ता वितरणका लागि चाँडै नै बैंकसँग छलफल गर्ने जिसीको भनाइ छ ।