चितवन : भरतपुर महानगरपालिकाको वडा नम्बर १, २ र ३ मा गत निर्वाचनमा नेकपा एमालेका मेयर पदका उम्मेदवार देविप्रसाद ज्ञवालीले पाएको भोट माओवादी केन्द्रकी रेनु दाहालको भन्दा १ हजार ६ सय ७८ ले बढी थियो।

यसपालि यी तीन वडाको मतगणना सकिँदा एमालेका विजय सुवेदीको अग्रता ५० मात्रै भयो।

सुवेदीले ३ हजार ९ सय ४४ मत ल्याउँदा दाहालले ३ हजार ८ सय ९४ ल्याइन्।

अघिल्लो निर्वाचनको तथ्यांक केलाउँदा एमालेका लागि भरतपुर महानगरका यी तीन यस्ता वडा हुन् ती वडाको भूमिका कांग्रेस-माओवादीसहितको गठबन्धनलाई ६, ७ र ८ नम्बरमा क्षतिपुर्ति तिर्न महत्वपूर्ण हुन्छ। कांग्रेसको गढ मानिने वडा नम्बर ६,७ र ८ मा गत निर्वाचनमा कांग्रेस-माओवादीकी साझा उम्मेदवार दाहालले ज्ञवालीले भन्दा १ हजार ५३१ भोट बढी ल्याएकी थिइन्।

बीचमा रहेको वडा नम्बर ४ मा दाहालले ६५ भोटले र ५ मा ज्ञवालीले ५६ भोटले अग्रता लिएका थिए।

ज्ञवाली आफूले ती वडामा बढाएको मत यसपालि कांग्रेसका बागी जगन्नाथ पौडेलले काटिदिएको हुनसक्ने बताउँछन्। झट्ट हेर्दा देखिन्छ पनि त्यस्तै। जगन्नाथको चुनाव चिन्ह भुइँकटहरमा यी वडामा गरेर १ हजार ५ सय ७२ भोट खसेको छ।

वडा नम्बर १ र २ मा ११ प्रतिशत भोट ल्याएका जगन्नाथले ३ मा २० प्रतिशत ल्याए। वडा नम्बर ४ को प्रारम्भिक गणनामा उनको भोट अझै बढी देखिएको छ। गणनामा सहभागी एक कर्मचारीकाअनुसार यो वडामा भुइँकटहरमा २५ प्रतिशत मत आइरहेको छ।

जगन्नाथले पाइरहेको मतको असर गठबन्धनलाई त परेको छ नै, त्योभन्दा बढी असर एमालेलाई परिरहेको छ। एमाले फुटेको बेलामा बनेको गठबन्धनले भरतपुरमा एमालेलाई ठूलो मतान्नतरले पराजित गर्ने आँकलन गरेको थियो। एमालेले जगन्नाथले कांग्रेसको भोट काट्ने र त्यसको फाइदा आफूलाई हुने ठानेको थियो।

तर अहिलेसम्मको भोटको ट्रेन्ड हेर्दा मतान्तर फराकिलो पार्ने गठबन्धनको चाहना र भुइँकटहर सहयोगी हुने एमालेको आँकलन दुबै गलत देखिन्छ।

गठबन्धन र एमाले दुवैतर्फका नेताहरू अहिले भरतपुरका धेरै मतदाता भएका १०, ११ र १२ नम्बर वडा र पश्चिम चितवनमा आफ्नो भोट बढी आउने र जित्ने दाबी गरिरहेका छन्।

गत निर्वाचनमा वडा नम्बर ९ देखि १५ सम्म ज्ञवालीले, १६ देखि २० सम्म दाहालले अग्रता लिएका थिए। २१, २२ र २३ मा ज्ञवालीको, २४ देखि २९ सम्म दाहालको भोट बढी आएको थियो।

अन्तत: दाहालले ज्ञवालीलाई २०३ भोटले हराएकी थिइन्।