काठमाडौं : दुई महिनादेखि जबर्जस्ती करणी मुद्दामा अभिनेता पल शाह तनहुँ जिल्ला कारागारमा कैद छन् ।
नाबालिकामाथि बलात्कार गरेको आरोपमा उनले फागुन १५ गते जिल्ला प्रहरी कार्यालय तनहुँमा आत्मसमर्पण गरेका थिए ।
त्यसपछि हिरासतमा रहेका उनी अदालतले पुर्पक्षका लागि थुनामा राख्ने आदेशपछि कारागार चलान भएका हुन् ।
उनीविरुद्धको मुद्दा अहिले अदालतमा विचाराधीन रहेको छ । दमौलीस्थित कारागारमा पललाई भेट्न अहिले दिनहुँ आफन्त र चलचित्रकर्मीको घुइँचो लाग्छ । पललाई भेट्न आइतबार दिउँसो काठमाडौंबाट केही कलाकार र उनको मुद्दामा बयान दिएका गायक दुर्गेश थापा पनि तनहुँ कारागार पुगे ।
पललाई भेटेपछि सञ्चारकर्मी प्रकाश सुवेदीले पलको दिनचर्याबारे जानकारी गराएका छन् ।
सुवेदीका अनुसार कारागारभित्र पल बिहान ५ बजे उठ्नुपर्ने नियम छ । उठेपछि हल्का कसरत गर्छन् । त्यसपछि ध्यान योगा पनि गर्ने गरेका छन् । कारागारमा घण्टी लगाएको समयभित्रै खाना खानुपर्छ ।
बिहान १० देखि ११ बजे बीचमा खाना खानुपर्छ । सुवेदीका अनुसार हप्तामा दुई दिन मासु खाना दिइन्छ । कारागारभित्र रेस्टुरेन्ट पनि छ । पैसा हुनेले रेस्टुरेन्टमा अर्डर दिएर खाना लिन सक्छन् ।
आफ्नो खर्चमा जे मगाएर पनि खान पाउने व्यवस्था रहेको उनको भनाई रहेको छ । उनका अनुसार पललाई खानाको समस्या छैन् । उनलाई बेलाबखत बहिनीले पनि खाना लगिदिने गरेकी छन् ।
तर कहिलेकाहीं त्यहाँ भएको रेस्टुरेन्टमा खाना खान्छन् । खाना र बस्नमा कुनै समस्या नभएको कुरा पलले बताउने गरेका छन् । उनका अहिले कारागारभित्र पनि धेरै साथीहरु बनेका छन् । जेलभित्र पनि उनलाई सबैले हिरो भनेर माया र सम्मान दिन्छन् । सुवेदीले बताए अनुसार पलले अहिले कपाल काटेका छन् । लामो कपाल पालेर भित्र बस्न पाइदैँन । जेल प्रशासनले नै कपाल काट्न लगाएको थियो ।
कपाल काटेर पल केही दुब्लो देखिएका छन्, तौल भने ठीक छ । शारीरिक अवस्था राम्रै छ । पल भएको कारागारमा एक नृत्य निर्देशक पनि छन् । कारागारभित्र उनीहरु साथी भैसकेका छन् ।
ती नृत्य निर्देशकले विभिन्न गीतमा डान्स कम्पोज पनि गराउने गरेका छन् । कारागारबाट बाहिर आएपछि त्यो गीतलाई सुटिङ गर्ने योजना पनि उनीहरुले बनाइरहेका छन् । भित्रै टेबलटेनिस खेल्न पाइन्छ ।
वातावरण राम्रो रहेछ । भेट्न जाने व्यक्तिहरु निर्वाध रुपमा भेट्न सक्छन् । अध्ययनको कुरा गर्दा पल मनिषा कोइरालाले लेखेको पछिल्लो पुस्तक ‘हिल्ड : हाउ क्यान्सर गिभ मी अ न्यु लाइफ’ पढ्दैछन् । उनले आफू जेलभन्दा पनि होस्टल बसेजस्तो लाग्ने बताए । कारागारमा टेलिभिजन हेर्न मिल्छ ।
