सर्लाही : भुक्तानी नदिएको भन्दै किसानले उद्योगको चिनी बिक्रीमा अवरोध गरेका छन् । सर्लाहीको बग्दहस्थित महालक्ष्मी चिनी उद्योगको गोदाममा रहेको चिनी उद्योगीले बिक्रीका लागि लैजान थालेपछि स्थानीय किसानले अवरोध गरेका हुन् ।

किसानको बाँकी रहेको झुक्तानी चुक्ता गरेर मात्र चिनी उठाउन माग गरेका छन् । उद्योग ब्यवस्थापनले बुधबार तीनवटा ट्रकमा चिनी लोड गरेर बिक्रीका लागि लैजान खाजेको थियो । त्यसपछि सयौंको संख्यामा जम्मा भएका किसानले ट्रकलाई अवरोध गरेका थिए । भुक्तानी नपाएसम्म उद्योगको कुनै पनि उत्पादन बाहिर जान नदिने किसानहरूको अडान छ ।

नगदै दिने भनेर किनेको उखुको भुक्तानी अझैसम्म नदिएकाले चिनी निकासी रोक्नु परेको स्थानीय किसान बिनोद महतोले बताए । ‘सिजनमा नगदै दिन्छु भनेर उखु खरिद गरे, तर दुई महिना भन्दा बढी भइसक्दा पनि दिएका छैनन्,’ उनले भने, ‘उद्योगीमाथि विश्वास नलागेर चिनी निकासी रोक्नुपर्‍यो ।’ किसानको अडानका कारण उद्योग प्रशासनले ट्रकमा लोड गरिसकेको चिनी फेरी गोदाममै फर्काएको छ । उद्योगबाट करिव १८ करोड रुपैयाँ भुक्तानी लिन बाँकी रहेको किसानको भनाइ छ । किसान नेता हरिश्याम रायले चालु अर्थिक वर्षमा खरिद गरेको उखुको बक्यौता रकम नदिएसम्म चिनी लैजान नदिने बताए ।

‘यस वर्ष किसानले बिक्री गरेको उखुको भुक्तानी नहुन्जेल उद्योगबाट कुनै पनि सामान बाहिर जान दिँदैनौ, तर यस बारेमा हामीले ठोस निर्णय गरिसकेका छैनौं,’ उनले भने, ‘अरु वर्ष जस्तो यो वर्ष उधारो सम्झौता पनि हुँदैन, हामीले उखु बेचेका छौं, झुक्तानी चाहिन्छ ।’ मिल संचालकले त्रसिङ गरेको उखुको ९० प्रतिशत भुक्तानी भइसकेको जनाएका छन् । किसानको भुक्तानी समयमै भइरहेको मिल संचालक वीरेन्द्र कनौडियाले दाबी गरे ।