काठमाडौं : सरकारले स्थानीय तहको निर्वाचन २०७९ साल जेठ चार गते गर्ने भएको छ । आज प्रधानमन्त्री निवास बालुवाटारमा प्रधानमन्त्री शेरबहादुर देउवा र निर्वाचन आयोगका पदाधिकारीबीच स्थानीय तहको निर्वाचन २०७९ जेठ चार गते एकै चरणमा गर्ने विषयमा छलफल भएको छ ।
छलफलमा प्रधानमन्त्री देउवाले जेठ चार गते निर्वाचन गर्ने प्रस्ताव गर्नुभएको थियो भने आयोगले पनि सोही मितिमा निर्वाचन गर्न सकिने भन्दै सहमति जनाएको छ ।
छलफलपछि प्रधानमन्त्री देउवाले सरकारले छिट्टै मिति घोषणा गर्ने भन्दै निर्वाचनको तयारी अघि बढाउन आयोगलाई आग्रह गर्नुभएको छ । प्रधानमन्त्रीले निर्वाचनका लागि आवश्यक सुरक्षा व्यवस्थाको सबै तयारी गृह मन्त्रालयले गर्ने भन्दै आयोगका तर्फबाट तयारी गर्न आग्रह गर्नुभएको हो ।
अबको मन्त्रिपरिषद् बैठकबाट निर्वाचनको मिति घोषणा हुने छ । मन्त्रिपरिषद्को नियमित बैठक हरेक बिहीबार बस्ने भएपनि निर्वाचनको मिति घोषण गर्न ढिलो हुँदा प्रस्तावित समयमा निर्वाचन सम्पन्न गर्न समय अपुग हुने भएकाले आज वा भोलि नै मन्त्रिपरिषद् बसी मिति घोषण गर्ने सरकारको तयारी रहेको छ ।
स्थानीय तहका जनप्रतिनिधिको पदावधि आगामी जेठ ५ गते सकिँदैछ । त्यसअगावै स्थानीय तहको निर्वाचन गरिसक्नु पर्ने कानुनी व्यवस्था छ।
