नवलपरासी : पश्चिम नवलपरासीको बर्दघाट १६ अवस्थित दाउन्ने देवी सामुदायिक वन क्षेत्रको भालु खोलामा शनिबार एक मृत पाटे बाघ फेला परेको छ ।

विहानको समयमा गाउलेहरु जंगल गएका बेला गोली लागेको मृत अवस्थामा पोथी बाघ देखेपछि प्रहरी र वन कार्यालयलाई खबर गरेका थिए।
साढे ७ फिट लम्बाई र ३ फिट उचाई रहेको करिब १ सय ५० किलोको ब्यस्क पोथि पाटेबाघ मृत अवस्थामा फेला परेको बर्दघाट सरावल सब डिभिजन वन कार्यालय बर्दघाटले जनाएको छ ।

सो बाघलाई सुरक्षाकर्मी र वन कार्यालयका कर्मचारीहरुले बर्दघाट सरावल सब डिभिजन वन कार्यालय बर्दघाटमा ल्याएका छन । मृत बाघको प्रकृती हेर्दा वन्यजन्तु चोरीशिकारी गर्ने तस्करहरुले पासोमा पारी गोली हानी हत्या गरेको हुन सक्ने वन कार्यालय बर्दघाटका प्रमुख गिरीराज पन्तले बताए ।
उनले घटनाको थप अनुसन्धान भइरहेको समेत जानकारी दिए ।
मृत बाघलाई आवश्यक वन कानुनी प्रकृया पुरा गरि सुरक्षाकर्मी, जनप्रतिनिधि, पत्रकारको रोहबरमा ईलाका वन कार्यालयकै परिसरमा गाडिने प्रमुख पन्तले जानकारी दिए ।