काठमाडौँ : प्रधानमन्त्री शेरबहादुर देउवाले स्थानीय तहको निर्वाचन तत्काल गर्न प्रस्ताव गर्नुभएको छ । ।
यसअघि अनिर्णित बनेका प्रधानमन्त्री देउवाले स्थानीय तहको निर्वाचन ऐन २०७३ को संशोधन नगरी चाँडै स्थानीय तहको निर्वाचन गर्न प्रस्ताव गर्नुभएको हो ।
यसअघि निर्वाचन आयोगले पत्र लेखरै स्थानीय तह निर्वाचन ऐनअनुसार आगामी जेठ ५ मा गर्न सकिने भन्दै ध्यानाकर्षण गराएको थियो ।
सत्तारुढ गठबन्धनले भने निर्वाचनका लागि आलटाल गरिरहेका थिए ।
प्रमुख प्रतिपक्षी दल नेकपा एमालेले पनि स्थानीय तहको निर्वाचन निर्धारित समयमा नै गर्न आग्रह गरेको थियो । स्वार्थगत रुपमा मिति सारिए त्यसका विरुद्ध आन्दोलन गर्ने समेत एमालेले चेतावनी दिएको थियो ।
त्यस्तै, राष्ट्रपति विद्यादेवी भण्डारीले पनि प्रधानमन्त्रीलाई स्थानीय निकायको निर्वाचन निर्धारित समयमा नै गराउन उचित हुने सुझाव दिनुभएको थियो ।
प्रधानमन्त्री देउवाले शनिबार बालुवाटारमा बसेको पाँचदलीय गठबन्धनको बैठकमा ऐन संशोधन नगरी स्थानीय तहको निर्वाचनतर्फ लागौँ भन्ने प्रस्ताव गरेको बताइएको छ ।
यद्यपि देउवाले निर्वाचन कहिले गर्ने भन्नेबारे चाँही खुलाउनुभएको छैन ।
