जनकपुरधाम : जनकपुरधाममा जनमत पार्टीका कार्यकर्ता र प्रहरीबीच आज झडप भएको छ ।
राष्ट्रियसभा चुनावअन्तर्गत मधेश प्रदेशको मतदानस्थल महेन्द्रनारायण निधि स्मृति प्रतिष्ठानभित्र जनमत पार्टीका कार्यकर्ताहरूले बाँसको भाटा लिएर छिर्न खोज्दा झडप भएको हो ।
सुरक्षाकर्मीले भीडलाई तितर बितर पार्न केही सेल अश्रुग्याँस प्रहार गरेका थिए । जनमत पार्टीका कार्यकर्ताहरूले राष्ट्रियसभाको चुनावमा मतदान गर्न विभिन्न जिल्लाबाट आएका प्रदेश सांसद्, मेयर र उपमेयरका गाडीहरूलाई ‘निशाना’ बनाएर तोडफोड गरेका थिए । उनीहरूले जनता समाजवादी पार्टीका सांसद्हरू अशोक यादव, मनिष सुमन, नेत्रविक्रम साह, हरिवन नगरपालिकाका मेयर गणेश प्रसाइँलगायत सवार गाडी तोडफोड गरेका छन् ।
मल दिएपछि मात्र भोट खसाल्न पाइने भन्दै जनमत पार्टीले राष्ट्रियसभाको चुनावमा अवरोध पुर्याउन खोजेको हो । जनमत पार्टीले किसानले मलखाद पाउनुपर्नेलगायत ११ बुँदे माग राखी किसान आन्दोलन गर्दै आएको छ ।
