काठमाडौं : तीन साताअघि गोंगबुमा एक महिलाको ‘सामूहिक बलात्कार’ भएको घटनामा प्रहरीले घटनामा संलग्नहरुलाई पक्राउ गरिसकेको छ।
हाल यस प्रकरणमा नयाँ तथ्यहरु भेटिएका छन् । ‘पीडित’ महिला र आरोपी पुरुषहरुबीच पैसाको लेनदेनसबन्धी विवाद रहेको पाइएको छ ।
पीडित भनिएकी महिला पेशेवर यौनकर्मी रहेको पनि खुलासा भएको छ। । शर्तबमोजिम पैसा नपाएपछि उनले सामूहिक बलात्कारमा मुद्दा दायर गरेको प्रहरी अनुसन्धानले देखाएको छ ।
गत पुस १२ गते साँझदेखि भोलिपल्ट साँझसम्म ९ जना युवाले सुर्खेत घर भएकी ३२ वर्षीया महिलालाई नयाँ बसपार्कस्थित मित्रनगरका विभिन्न तीनवटा होटलमा लगेर यौ,न सम्बन्ध राखेका थिए ।
बलात्कारका आरोपीमध्ये मुगुको एकै नगरपालिकाका ७ जना छन् । उनीहरु वैदेशिक रोजगारीका लागि काठमाडौंमा बसिरहेका थिए । उनीहरुमध्ये केहीको भिसा लागिसकेको थियो ।
प्रहरीका अनुसार पुस १२ गते साँझ मुगुको छायाँनाथ रारा नगरपालिका स्थायी घर भएका २४ वर्षीय युवराज बडुवालले ती महिलालाई भेटेका थिए । पैसाको विषयमा सहमतिपछि ती महिलालाई त्यसरात मदिरा पिएर सँगै सुत्ने भनेर होटल लगेको युवराजले बयान दिएका छन् ।
होटलमा त्यसरात युवराज र छायाँनाथ रारा नगरपालिकाकै २३ वर्षीय हिक्मत नेपालीसँग ती महिला बसेको अनुसन्धानमा पाइएको छ । उनीहरु सबैले मदिरा सेवन गरेका थिए ।
भोलिपल्ट बिहान युवराजले ती महिलालाई तीन सय रुपैयाँ दिए । त्यसपछि हिक्मतले महिलालाई आफ्ना ६ जना साथीहरु रहेको अर्को होटलमा पुर्याए ।
त्यतिबेलासम्म महिला नशामै थिइन् । हिक्मतले साथीहरुलाई ती महिलासँग यौ,नसम्पर्क गर्ने भए प्रत्येकले एक–दुई सय रुपैयाँ दिनुपर्ने बताएका थिए । हिक्मतले साथीहरुबाट पैसा पनि उठाएको तर महिलालाई नदिएको पाइएको छ ।
त्यहाँबाट निस्किएकी महिलाको भेट ४३ वर्षीय गोपालकुमार शिरिषसँग भएको थियो । भोलिपल्ट ओमान उड्न लागेका शिरिषले भने ती महिलासँग एक्लै सम्बन्ध राखेको प्रहरीको दाबी छ ।
शिरिषले समेत पैसा नदिएपछि ती महिला बलात्कृत भएको भन्दै प्रहरीकहाँ पुगेकी थिइन् । त्यसै दिन शिरिष पक्राउ परेका थिए । त्यसको भोलिपल्ट पुस १४ गते प्रहरीले कलङ्कीको एक गेस्ट हाउसबाट ६ जनालाई पक्राउ गरेको थियो ।
सरकारी वकिल कार्यालयले बुधबार अदालतमा मुद्दा पेश गरेको छ । अभियोगपत्रमा तीनवटा होटलका सञ्चालकसहित १२ जनालाई प्रतिवादी बनाइएको छ । होटल सञ्चालकलाई मतियार बनाइएको छ भने बलात्कारमा संलग्न ९ जनामध्ये ८ जनालाई सामूहिक बलात्कार र एक जनालाई बलात्कारमा प्रतिवादी बनाइएको छ ।
काठमाडौं प्रहरी परिसर प्रमुख सुदिप गिरीले सरकारी वकिल कार्यालयले होटल सञ्चालकसमेतलाई प्रतिवादी बनाउनुपर्ने बताएपछि उनीहरुलाई पक्राउ पुर्जी लिएर हिरासतमा लिइएको बताए ।
तीनै जना होटल सञ्चालकलाई एक साताअघि मात्र पक्राउ गरिएको हो । अब शुक्रबारदेखि अदालतमा प्रतिवादीको बयान हुनेछ र त्यसपछि थुनछेकको बहस हुनेछ ।
कानूनमा १८ वर्ष वा सोभन्दा बढी उमेरका महिलालाई बलात्कार गरेमा ७ देखि १० वर्षसम्म कैद सजाय हुन्छ । यदि बलात्कार सामूहिक भए थप ५ वर्षसम्म कैद सजाय हुने व्यवस्था छ ।
