चितवन । केवीए ग्लोवल प्रालिले भरतपुर फुटवल क्लवलाई स्पोन्सर गरेको छ । भरतपुरको लायन्सचोकमा रहेर जापानका लागि विद्यार्थी पठाउँदै आएको केवीए ग्लोबलले कर्पोरेट उत्तरदायित्व सम्झिएर खेल क्षेत्रको उन्नती र विकासका लागि स्पोन्सर गरेको सीइओ शम्भु कडेँलले बताए ।

वार्षिक ८ लाख दिने सहमति पत्रमा हस्ताक्षर गरी आजबाट स्पोन्सर सुरु भएको हो । प्रालिका सीइओ सम्भु कडेँल, नेशनल म्यानेजर उत्तम सापकोटा,क्वलका अध्यक्ष लालसीङ गुरुङ, एन्फा चितवनका महासचिव रामहरी ढकाल लगायतले सम्झौता पत्रमा हस्ताक्षर गरेका छन् ।

अध्ययनका लागि विद्यार्थीलाई अष्ट्रेलिया पठाउँदै आएको ग्लोबलले आफ्नो कर्पोरेट सामाजिक उत्तरदायित्व वहन गर्दै तीन वर्षका लागि स्पोन्सर गरेको सीइओ कडेँलले बताए । खेलले मानिसलाई स्वास्थ्य बनाउनेदेखि अनुशासन सिकाउने र राष्ट्रलाई चिनाउने महत्वपूर्ण माध्यम भएकाले स्पोन्सर गर्न तयार भएको उनको भनाई थियो । आफूहरुको सहयोगपछि भरतपुर फुटवल क्लवले अझ बढी सफलता प्राप्त गर्नेमा आफू विश्वस्त रहेको उनले बताए ।

ग्लोवलको डार्विनमा आफ्नै केबीए ग्लोवल क्रिक्रेट क्लव समेत रहेको र त्यहाँ पनि एक दर्जन बढी स्पोर्टस क्लवहरुलाई स्पोन्सर गर्दै आएको नेशनल म्यानेजर उत्तम सापकोटाले बताए । त्यस्तै बाढी पहिरो पीडित, कोभिड महामारी लगायतमा समेत आर्थिक सहयोग गर्दै सामाजिक दायित्नव वहन गर्दै आएको उनको भनाई थियो ।

सहमति पत्रमा हस्ताक्षर पछि बोल्दै एन्फा चितवनका महासचिव रामहरी ढकालले जिल्लाबाट डिभिजन सी सम्म खेल्ने क्षमता बनाएको एक मात्रै फुटवल क्लव भरतपुर भएको बताए । कर्पोरेट सँगै खेल क्षेत्रमा गरेको लगानी खेर जान नदिनेगरी खेलाडीहरुलाई तालिम, प्रशिक्षण गर्ने उनको भनाई थियो । चन्दाका रुपमा धेरैले सहयोग गरेपनि लाखौँ रकमसहितको स्पोन्सर गरेको ग्लोवल मोफसलमा पहिलो भएको समेत बताए ।

क्लवका कोच ध्रव भुषालले अव तीन वर्ष भरतपुर फुटवलले क्लवले धेरै मेहनत गर्ने बताए । खेलाडीहरुलाई भत्ता, तालिम, उनीका लागि खेल सामाग्री लगायतका क्षेत्रमा खर्च गर्ने बताउँदै लगानीको प्रतिफल दिने बताए । हालसम्म देशभरका गोल्डकपमा सहभागी हुँदै ६ वटा खेलमा फाइनल सम्म पुगेको बताउँदै आगामी दिनमा विजेता वन्नेगरी तयारीमा लाग्ने बताए । ग्लोवलको सहयोगले ठूलो राहत मिलेको उनको भनाई थियो ।

सो अवसरमा केवीए ग्लोवल लेखिएको जर्सी समेत सार्वजनिक गरिएको थियो । यस अघि भरतपुर फुटवल क्लवलाई सेन्ट्रल कलेजले स्पोन्सर गर्दै आएको थियो ।

२०५८ सालमा स्थापना भएको भरतपुर फुटवल क्लवसँग अहिले करिव २५ जना खेलाडी रहेका छन् । खेलक्षेत्रबाट चितवनलाई चिनाउन अग्रणी भूमिका खेलको क्लवले केही समय अघि मात्रै सी डिभिजन खेलेको थियो ।

कार्यक्रममा क्लवका सचिव रोमश पाण्डे, नेपाल खेलकुद पत्रकार मञ्च नेपालका अध्यक्ष विनोदवावु रिजाल, महासचिव दिपेन्द्र अधिकारी, चितवन जिल्ला फुटवल संघका सदस्य गोपाल लामा लगायतको उपस्थिती रहेको थियो ।