काठमाडौको रानिबारिमा एउटा तरकारी बेच्ने ठेला बाटोमा थियो । यसो त तरकारी बेच्ने त्यस्ता ठेला तथा पसलहरु थुप्रै भेटिन्छन काठमाडौमा । तर उक्त ठेलामा तरकारी मात्र थिएन । एउटा सानो ठेला जसमा सागका मुठाहरु थिए र त्यही बिचमा एउटा तरकारी राख्ने क्यारेट पनि । उक्त क्यारेटमा भने तरकारी नभएर एउटा ९ महिनाको बच्चा थियो । तरकारी र क्यारेटमा बच्चा राखिएको ठेला लिएर हिडिरहेकी थिइन एक महिला । उनको दैनिकी यसरी नै बित्ने गरेको रहेछ ।

रसुवाकी कुमारी बस्याल काठमाडौमा कोठाभाडामा बस्दै आएकी छिन । उनी अहिले दैनिक १०० रुपैयाँ कमाउनका लागि यसरी दुख गरिरहेकी छिन । बच्चालाई लिएर घर मै बस्ने रहर सबैलाई हुन्छ तर आफ्नो भने बाध्यताले गर्दा नै यसरी ठेलामा लिएर हिड्नु परेको कुमारिले बताईन । आफू कोठामा एक्लै भएकोले पनि बच्चालाई हेरचाह गर्न्व कोहि नभएर यसरी हिड्नु परेको उनको भनाई छ । अहिले ९ महिना पुगेको बच्चालाई कुमारिले ४ महिनाको हुदाँबाट नै यसरी ठेलामा लिएर हिड्न थालेको बताईन ।

रामेछाप माइती भएकी उनी बिबाह गरेर बच्चा पेटमा हुदाँ नै श्रीमानले छाडेर हिडेको कुमारी बताउँछिन । पहिले पनि तरकारी नै बेच्दै आएको उनको भनाई छ । नानी जन्मिएको केही महिनासम्म कोठामै बसेको र पहिले कमाएको सकिन लागे पछि माग्नु भन्दा आफुले जानेको काम गरेर खाने भन्ने सोच आएर नै आफुले फेरि सुरु गरेको उनको भनाई छ । यसरी साग बेच्दै हिड्दा दैनिक १०० रुपैया देखि १५० रुपैयाँसम्म कमाउने गरेको कुमारीको भनाई छ । उक्त रकम बच्चाको लागि पुग्ने उनी बताउँछिन ।

अहिलेसम्म त नानिलाई र आफुलाई दुख सुख एक छाक भए पनि खान पुगेता पनि पछि नानिको पढाइ लगायत खर्चको लागि समस्या हुने चिन्ता उनको रहेको छ । तर पनि आफू दुख गर्न भने नछाड्ने उनको अठोट छ । पहिले कमाएको केही बचतले कोठाभाडा तिर्दै आएको र अहिले कमाएकोले नानीलाई र आफुलाई खान दुख सुख पुगेको उनी बताउँछिन । कहिलेकाहीँ त सादा खाना नभएर जाउलो खाएर पनि दिन बिताउनु पर्ने अवस्था रहेको कुमारिको भनाई छ ।

दैनिक बिहान ४ बजे देखि उनी ठेला लिएर हिड्ने गर्छिन । १० बजे तिर फर्किएर खाना खाने अनि फेरि बेलुका ४ बजे देखि निस्किने गरेको उनी बताउँछिन । केही साथिहरुले कहिलेकाहीँ सहयोग गर्ने गरेको उनी बताउँछिन । त्यही बेला माछामासु खाने गरेको उनको भनाई छ । नानी बिरामी नभएमा दैनिक ६०/७० रुपैयाँ खर्च हुने उनको भनाई छ । बाकी रहेकोले आफू जे जस्तो हुन्छ त्यही खाने गरेको उनको भनाई छ । यसरी दुख होला भनेर आफुले नसोचेको उनी बताउँछिन । तर पनि अहिले आफ्नो लागि भन्दा बच्चाको लागि दुख गर्न मन लाग्ने गरेको उनी बताउँछिन । (भिडियो हेर्नुस)