चितवन, भदौ ११–

चितवनको नारायणगढ–मुग्लिन सडक खण्डमा सडक नै भासिएको छ ।

सो सडक खण्डको भरतपुर–२९ चौध किलोमा सडक भासिएको जिल्ला ट्राफिक प्रहरी कार्यालय चितवनका प्रमुख भगवान थापाले जानकारी दिए । निरन्तरको वर्षाले झण्डै ३० मिटर सडक भासिएको छ ।

अहिले सो क्षेत्रमा एकतर्फी सवारी संचालन भइरहेको थियो । सडक भासिएको क्षेत्रमा एक महिना अगाडि भिमकाय ढुंगा खसेको थियो ।

सडक भासिएको ठाउँबाट करिब २० मिटर तल त्रिशूली नदी छ । नदीको कटानले सडक भासिएको अनुमान गरिएको छ ।

डिभिजन सडक कार्यालयका सूचना अधिकारी ई. शिव खनालका अनुसार सो ठाउँमा ३८ मिटर लामो भाग भासिएको छ । सडक भासिएको ठाउँमा पर्खाल लगाएर सडक सुरक्षित गर्ने तयारी गरिएको उनले बताए ।