सभापतिमा फेरि दोहोरिने आश गरेर बसेका सभापति शेरबहादुर देउवालाई उपसभापति विमलेन्द्र निधिले गतिलै झड्का दिएका छन ।
आसन्न महाधिवेशनमा दोहोरिने आकांक्षा राखेका नेपाली कांग्रेसका सभापति शेरबहादुर देउवाको समूह सग्लो नरहने करिब ‘निश्चित’भएको छ । सभापतिमा दावी गरेर निरन्तर संवादमा रहेका उपसभापति विमलेन्द्र निधिले औपचारिकरूपमै महाधिवेशनको तयारी थाल्ने भएपछि संस्थापन समूहबाट २ उम्मेदवार हुने निश्चित भएको हो ।
उपसभापति निधिले सभापति लड्ने तयारीका लागि शुक्रबारदेखि सम्पर्क कार्यालय सञ्चालन गर्ने भएका छन् । महाधिवेशन अभियान संयोजन गर्ने गरी थापागाउँस्थित बानेश्वर ब्यांक्वेटमा निधिले सम्पर्क कार्यालय खडा गरेका हुन् ।
‘नेपाली कांग्रेसको १४ औं महाधिवेशनमा मैले सभापति पदमा उम्मेदवारी दिने निर्णय गरेको सम्बन्धमा यहाँहरू जानकार नै हुनुहुन्छ । यसै सिलसिलामा बानेश्वरस्थित बानेश्वर ब्यांक्वेटमा मेरो सम्पर्क कार्यालय शुभारम्भ हुन गइरहेको पनि सहर्ष जानकारी गराउँछु’, निधिले सामाजिक सञ्जालमार्फत भनेका छन् ।
