भरतपुर : ज्येष्ठ नागरिकको अधिकार प्राप्तिका लागि आवश्यक सहयोग र पहल गरिरहेको महानगर प्रमुख रेणु दाहालले बताउनुभएको छ ।

३१ औं जेष्ठ नागरिक दिवसको अवसरमा शुक्रवार आयोजित एक कार्यक्रमकाबीच जेष्ठ नागरिकहरुलाई सम्मान गर्ने क्रममा दाहालले यस्तो वताउनुभएको हो ।

उहाँका अनुसार अहिले विभिन्न वडामा ज्येष्ठ नागरिक भवन निर्माणको काम पनि तीव्र गतिमा अघि बढिरहेको छ । ‘अहिलेको व्यस्त समयमा ज्येष्ठ नागरिकहरुको दैनिकी कष्टकर भइरहेको छ । उहाँहरु एक्लोपन महसुस गरिरहनु भएको छ, उहाँले भन्नुभयो, ‘महानगरले यो विषयलाई गम्भीरताका साथ लिएको छ । यसैलाई ध्यान राख्दै हामीले सबै वडामा जेष्ठ नागरिक डे केयर सेन्टर निर्माणको योजना ल्याएका छौं ।’ डे केयर सेन्टरमा भजन कृतनसहित दिवाकालिन सेवा दिइने मेयर दाहालले बताउनुभयो।

भरतपुर महानगरपालिकाले १०० बढी जेष्ठ नागरिकहरुलाई सम्मान गरेको छ । ३१ औं जेष्ठ नागरिक दिवसको अवसरमा उद्योग वाणिज्य संघ नारायणगढमा आयोजित एक कार्यक्रमकाबीच जेष्ठ नागरिकहरुलाई सम्मान गरेको हो ।

महानगरपालिका अन्तर्गतका २९ वटै वडाका पाँच–पाँच जना ज्येष्ठ नागरिकलाई सम्मान गरिएको छ । यस्तै एक सय वर्ष नाघेका १३ जना ज्येष्ठ नागरिकलाई सम्मानपत्रसहित सम्मान गरिएको छ ।

कार्यक्रममा ज्येष्ठ नागरिकहरुलाई दोसल्ला, पौष्टिक आहार र एक्एक हजार रुपैयाँ यातायात खर्चसहित सम्मान गरिएको थियो ।

कार्यक्रम महानगर प्रमुख रेणु दाहाल, उपप्रमुख पार्वती शाह ठकुरी, प्रमुख जिल्ला अधिकारी आशमान तामाङ, महानगरका प्रमुख प्रशासकीय अधिकृत रामबन्धु सुवेदी, चितवनका प्रहरी प्रमुख प्रहरी उपरीक्षक ओमप्रसाद अधिकारीलगायतको सहभागीतामा सम्पन्न भएको थियो ।