महोत्तरीमा उपमेयरको शौचालयमा १३ वर्षकी बालिका फेला परेपछि त्यो घटना रहस्यम बन्दै गएको छ । मनरा शिसवा नगरपालिकाकी उपमेयर रमिता प्रधानको घरको शौचालयमा बुधबार राति ८ बजे स्थानीय १३ वर्षीया एक बालिका फेला परेकी थिइन् ।
बालिकाले घटनामा उपमेयरका श्रीमान विनोद गामी, स्थानीय गिना बैठा र अर्का परीक्षण भन्ने एक स्थानीयलाई संलग्न भएको आरोप लगाएकी छन् । उपमेयरका श्रीमानलाई अनैतिक कार्य गरेको आरोप बालिकाका आफन्तले लगाएका छन् ।
तर उपमेयर रमिताले घटनामा आफ्ना श्रीमान् र अर्का परिक्षण भन्ने ब्यक्तिको संलग्नता अस्विकार गरेकी छन् । उनले आफ्ना श्रीमान्लाई अनावश्यक आरोप लगाएको बताएकी छन् ।
आफुले बालिकालाई शौचालयवाट बाहिर निकाल्नु भन्दा केही बेर अघि मात्र उनको आमासंग आगो तापेर बसेको अवस्थामा देखेको बताएकी छन् ।
उपमेयर प्रधानले साँझ साढे ७ बजे सरपल्लोचोकमा एक बैठकबाट आफू श्रीमान् र परीक्षणसँगै घर फकिँदा बालिका आफ्नी आमासँगै घर अगाडि आगो तापिरहेको देखेको बताइन् ।
‘एकैछिनमा बालिकाकी आमा छोरी हरायो भनेर कराउन थालिन्’ उपमेयर प्रधानले भनिन्, ‘तुरन्तै केही मान्छे जम्मा भए । प्रहरी आयो । मेरो घरको शौचालयबाट ती बालिका भेटिइन् । हामी पनि अच्चमित भयौं। त्यतिबेला पनि हामी श्रीमान् श्रीमतीसँगै थियौं ।’
उनले त्यो शौचालय आफुहरुले प्रयोग नगरेको बताएकी छन् । उनले छिमेकी जीवोदेवीसंग परिवारिक विवाद रहेको र त्यसैका कारण आफुहरुलाई गलत आरोप लगाएर राजनीति धुमिल पार्न खोजेको आरोप लगाएकी छन् ।
